കോഴിക്കോട്: വീടുകൾ പലപ്പോഴും അത് നിലനിൽക്കുന്ന സമൂഹത്തിന്റെ പ്രതിഫലനങ്ങളാണ്. ഒരു മിഡിൽ ക്ലാസ് മലയാളി കുടുംബത്തിൽ നടക്കുന്ന സംഭാഷണങ്ങളിലൂടെ സമൂഹത്തിൽ ഒളിഞ്ഞും തെളിഞ്ഞും കിടക്കുന്ന ആണധികാരത്തെയും വിവേചനങ്ങളെയും അന്ധവിശ്വാസങ്ങളെയും തുറന്നു കാട്ടുകയാണ് 'ഡൊമസ്റ്റിക് ഡയലോഗ്സ്' എന്ന സ്വതന്ത്ര സിനിമ. റൂട്സ് വീഡിയോ ഒ ടി ടി പ്ലാറ്റ്ഫോമിലൂടെയാണ് ചിത്രം പുറത്തെത്തിയിരിക്കുന്നത്.
പിമോക്ക ടേൽസിന്റെ ബാനറിൽ ഒരു കൂട്ടം യുവാക്കൾ ചേർന്നാണ് ഡൊമസ്റ്റിക് ഡയലോഗ്സ് പൂർത്തീകരിച്ചിരിക്കുന്നത്. നോൺ ലീനിയർ രീതിയിൽ കഥ പറയുന്ന സിനിമ പൂർണമായും സിങ്ക് സൗണ്ട് ഉപയോഗിച്ചാണ് ചിത്രീകരിച്ചിരിക്കുന്നത്. വൈഷ്ണവ്, ഗോകുൽ എന്നിവർ ചേർന്നാണ് ചിത്രത്തിന്റെ കഥയും സംവിധാനവും നിർവ്വഹിച്ചിരിക്കുന്നത്. ചിത്രത്തിന്റെ നിർമ്മാണ ചിലവുകൾക്കുള്ള തുക ക്രൗഡ് ഫണ്ടിങിലൂടെയാണ് സമാഹരിച്ചത്.
ബിനു ശേഖർ ഛായാഗ്രഹണം നിർവ്വഹിച്ച സിനിമയുടെ ശബ്ദമിശ്രണം നടത്തിയത് ഷൈജു എം. ആണ്. ആകാശ്, കാവ്യ, സുഷ, ഛന്ദസ്, അമിത്, ശ്രീലക്ഷ്മി, പുണ്യ എന്നിവരാണ് കഥാപാത്രങ്ങളെ അവതരിപ്പിച്ചിരിക്കുന്നത്. പ്രദീപ് , സ്നിഗ്ധ , അർഷാദ് , ജിബീഷ് , അരുണിമ, ഫെബിൻ, ആതിര എന്നിവരാണ് അണിയറയിൽ.