മുംബൈ: മഹാരാഷ്ട്രയിലെ റായ്ഗഡില്‍ കനത്ത മഴയിലും മണ്ണിടിച്ചിലിലുമായി 36 പേര്‍ മരിച്ചു. കൊങ്കണ്‍ പ്രദേശത്ത് കനത്ത മഴ തുടരുകയാണ്. പ്രദേശത്ത് രക്ഷാപ്രവര്‍ത്തനം നടക്കുന്നുണ്ട്. ഹെലിക്കോപ്പ്റ്റര്‍ ഉപയോഗിച്ചാണ് രക്ഷാപ്രവര്‍ത്തനങ്ങള്‍ നടത്തുന്നത് അതുകൊണ്ട് വീടുകളില്‍ കുടുങ്ങിക്കിടക്കുന്നവരോട് വീടുകളുടെ മുകള്‍ ഭാഗത്തേക്ക് മാറി നില്‍ക്കണമെന്ന് അധികൃതര്‍ നിര്‍ദേശിച്ചിട്ടുണ്ട്.
മഹാരാഷ്ട്രയില്‍ ഇന്നലെ മൂന്നിടങ്ങളിലാണ് മണ്ണിടിച്ചിലുണ്ടായത്. രത്‌നഗിരി ജില്ലയിലെ ചിപ്ലൂണ്‍ പ്രദേശത്ത് 24 മണിക്കൂര്‍ തുടര്‍ച്ചയായി മഴ പെയ്തതിനെത്തുടര്‍ന്ന് ജലനിരപ്പ് 12 അടി വരെ ഉയര്‍ന്നു. വശിഷ്ടി നദി കരകവിഞ്ഞൊഴുകിയതിനെത്തുടര്‍ന്ന് റോഡുകളും വീടുകളും വെളളത്തിനടിയിലായി. നഗരത്തില്‍ വൈദ്യുതി വിതരണം തകരാറിലായി.
അടുത്ത ദിവസങ്ങളിലും കനത്ത മഴ തുടരുമെന്ന് കാലാവസ്ഥാ വകുപ്പ് മുന്നറിയിപ്പ് നല്‍കിയിട്ടുണ്ട്. കൊങ്കന്‍ മേഖലയില്‍ മഴ തുടരുന്നതിനാല്‍ ട്രെയിന്‍ ഗതാഗതം നിര്‍ത്തിവച്ചിരിക്കുകയാണ്.
