ഹൈദരാബാദ്: ബാബറി മസ്ജിദ് പളളി പൊളിക്കുന്നതിന് നേതൃനിരയില്‍ പ്രവര്‍ത്തിക്കുകയും പിന്നീട് പ്രായശ്ചിത്തമായി ഇസ്ലാം മതം സ്ഥീകരിച്ച് പളളികള്‍ പണിയുകയും ചെയ്ത മുഹമ്മദ് ആമിറിനെ (ബല്‍ബീര്‍ സിംഗ്) ദുരൂഹസാഹചര്യത്തില്‍ മരിച്ച നിലയില്‍ കണ്ടെത്തി. ഹാഫിസ് ബാബാ നഗറിലെ വാടകവീട്ടിലാണ് അദ്ദേഹത്തെ മരിച്ച നിലയില്‍ കണ്ടെത്തിയത്.
പ്രദേശത്ത് ദുര്‍ഗന്ധം വമിച്ചതിനെത്തുടര്‍ന്ന് നാട്ടുകാര്‍ നടത്തിയ പരിശോധനയിലാണ് ആമിറിനെ മരിച്ച നിലയില്‍ കണ്ടത്. മുഹമ്മദ് ആമിറിന്റെ മരണത്തില്‍ കുടുംബാംഗങ്ങള്‍ പരാതി നല്‍കുകയാണെങ്കില്‍ കേസ് രജിസ്റ്റര്‍ ചെയ്ത് അന്വേഷണം ആരംഭിക്കുമെന്ന് കാഞ്ചന്‍ബാഗ് പൊലീസ് വ്യക്തമാക്കി.
ബാബറി മസ്ജിദ് തകര്‍ക്കാന്‍ മുന്നില്‍ നിന്ന് പ്രവര്‍ത്തിച്ചയാളാണ് കര്‍സേവക് പ്രവര്‍ത്തകനും സംഘപരിവാര്‍ നേതാവുമായിരുന്ന ബല്‍ബീര്‍ സിംഗ്. ബാബറി മസ്ജിദ് തകര്‍ത്തതിനുശേഷം കടുത്ത വിഷാദത്തിലായിരുന്ന ബല്‍ബീര്‍ പശ്ചാത്താപം മൂലം ഇസ്ലാം മതം സ്വീകരിക്കുകയായിരുന്നു. മുഹമ്മദ് ആമിര്‍ എന്ന പേര് മതം മാറിയതിനുശേഷം സ്വീകരിക്കുകയും ചെയ്തു. ഒരു പളളി പൊളിച്ചതിനുപകരമായി നൂറു പളളികള്‍ പണിയുമെന്ന് ദൃഢനിശ്ചയം ചെയ്തയാളാണ് മുഹമ്മദ് ആമിര്‍. 91 പളളികള്‍ അദ്ദേഹത്തിന്റെ നേതൃത്വത്തില്‍ ഇതിനകം പണിതുകഴിഞ്ഞു.
