ബോളിവുഡിലെ സൂപ്പർ ഹിറ്റ് താരജോഡികളായ ഷാരൂഖ് ഖാനും കജോളും വീണ്ടും ഒന്നിച്ചേക്കും. രാജ് കുമാർ ഹിറാനി സംവിധാനം ചെയ്യുന്ന ചിത്രത്തിലാണ് ഇരുവരും ജോഡികളായി വീണ്ടും സ്ക്രീനിൽ എത്തുക. കജോളിന് പുറമെ രണ്ട് പ്രധാന സ്ത്രീ കഥാപാത്രങ്ങളും ചിത്രത്തിലുണ്ടാകം. വിദ്യാ ബാലൻ, തപ്സി പന്നു എന്നിവരെയാണ് ഈ റോളുകളിലേക്ക് പരിഗണിക്കുന്നത്. മനോജ് ബാജ്പേയി, ബോമൻ ഇറാനി എന്നിവരും ചിത്രത്തിൽ വേഷമിടും.
പഞ്ചാബിൽ നിന്ന് കാനഡയിലേക്ക് കുടിയേറിയ കുടുംബത്തിന്റെ കഥയാണ് രാജ്കുമാർ ഹിറാനി ചിത്രത്തിൽ പറയുന്നത്. ഷാറൂഖിന്റെ ഭാര്യയായാണ് കജോൾ ചിത്രത്തിൽ വേഷമിടുക. റിപ്പോർട്ടറുടെ റോളാണ് തപ്സി പന്നുവിന്. വിദ്യാ ബാലനുമായി ചർച്ചകൾ പുരോഗമിക്കുകയാണെന്ന് സംവിധായകൻ അറിയിച്ചു. ചിത്രം സോഷ്യൽ കോമഡിയായിരിക്കുമെന്നും ഹിറാനി വ്യക്തമാക്കി. അണിയറ പ്രവർത്തനങ്ങൾ പൂർത്തിയായാൽ ചിത്രത്തെ കുറിച്ച് ഔദ്യോഗികമായ അറിയിപ്പ് ഉണ്ടാകുമെന്നും അദ്ദേഹം അറിയിച്ചു
ഹിറാനിയും ഷാറൂഖിന്റെ നിർമാണ കമ്പനിയായ റെഡ് ചില്ലീസും ചേർന്നാണ് ചിത്രം നിർമിക്കുന്നത്. അടുത്ത വർഷം ഏപ്രിലിൽ ചിത്രത്തിന്റെ ഷൂട്ടിംഗ് ആരംഭിക്കും. സിനിമയുടെ പേര് ഇതുവരെ പുറത്തുവിട്ടിട്ടില്ല. സ്വാനന്ദ് കിർകിറിന്റെ വരികൾക്ക് ശാന്തനു മൊയ്ത്ര സംഗീതം നൽകും. മറ്റ് സാങ്കേതി പ്രവർത്തകരെ തീരുമാനിച്ചിട്ടില്ല.
ഷാറൂഖ്-കജോൾ ജോഡിയുടെ സൂപ്പർ ഹിറ്റ് ചിത്രമായ ദിൽവാലെ ദുൽഹനിയാ ലേ ജായേഗായുടെ ഇരുപത്തിഅഞ്ചാം വാർഷികം കഴിഞ്ഞ വർഷമാണ് ആഘോഷിച്ചത്. ഇരുവരും നായികാ നായകന്മാരായി ഏഴ് ചിത്രങ്ങളാണ് ഇതുവരെ പുറത്തിറങ്ങിയത്. 1993 ല് കജോളിന്റെ രണ്ടാമത്തെ ചിത്രമായ ബാസിഗറിലാണ് ആദ്യം ഇരുവരും ഒന്നിച്ചത്. ശിൽപ്പാ ഷെട്ടിയുടെ ആദ്യ ചിത്രമായിരുന്നു ബാസിഗർ. ബോളിവുഡിലെ ചോക്ക്ളേറ്റ് നായകനിൽ നിന്ന് വില്ലൻ സ്വഭാവമുള്ള പ്രധാനകഥാപാത്രത്തെ ഷാറൂഖ് അവതരിപ്പിച്ച ചിത്രം വമ്പൻ ഹിറ്റായി. തുടർന്ന്1995 ൽ ദിൽവാലെ ദുൽഹനിയാ ലേജായേഗേ പുറത്തിറങ്ങി. അന്നേവരയുള്ള ഇന്ത്യൻ സിനിമയുടെ ചരിത്രം മാറ്റിമറിച്ച ചിത്രമായിരുന്നു ഡിഡിഎൽജെ.
അതേ വർഷം തന്നെ ഇറങ്ങിയ കരൺ അർജുനും ബോക്സ് ഓഫീസിൽ വിജയം നേടിയതോടെ ഷാറൂഖ് ബോളിവുഡിലെ സൂപ്പർ താര പദിവിയിലേക്ക് ഉയർന്നു. തുടർന്ന് കുഛ് കുഛ് ഹോതാ ഹെ, കഭി ഖുശി കഭി ഗം, എന്നീ ചിത്രങ്ങളിലും ഇരുവരും ജോഡികളായി അഭിനയിച്ചു. 2010 ൽ ഇറങ്ങിയ മൈ നെയിം ഈ ഖാൻ വൻ പരാജയം ഏറ്റുവാങ്ങി. ഷാറൂഖ് നായകാനായ ഡ്യൂപ്ലിക്കേറ്റ്, കൽഹോ ന ഹോ, ഓം ശാന്തി ഓശാന, റബ് നെ ബനാദിയി ജോഡി എന്നി ചിത്രങ്ങളില് കജോൾ ചെറിയ വേഷങ്ങൾ അഭിനയിച്ചിട്ടുണ്ട്. 2015 ൽ ദിൽവാലെയിലാണ് ഇരുവരും ഏറ്റവും ഒടുവിൽ ഒന്നിച്ച് അഭിനയിച്ചത്.