കോവിഡ്19 സംശയിച്ച് മൂന്നാറിൽ നിരീക്ഷണത്തിലായിരുന്ന 14 വിദേശികളുടെ സാമ്പിൾ നെഗറ്റീവ്. അയർലണ്ട്, ഫ്രാൻസ്,യുകെ എന്നീ രാജ്യക്കാരാണിവർ. മൂന്നാറിൽ വിവിധ ഹോട്ടലുകളിൽ നിരീക്ഷണത്തിലായിരുന്നു ഇവർ. അസുഖം ഇല്ലെന്ന് കണ്ടെത്തിയതിനാൽ ഇവരെ മടക്കി അയക്കാനുള്ള നടപടികൾ ആരംഭിച്ചു. രോഗം സ്ഥിരീകരിച്ച 5 വിദേശികളിൽ യുകെ സ്വദേശിയുടെ ആരോഗ്യനില മെച്ചപ്പെട്ടിട്ടില്ലെന്ന് ഡോക്ടർമാർ അറിയിച്ചു.
ഇടുക്കി ജില്ലയിൽ കർശന നിയന്ത്രണങ്ങൾ തുടരുകയാണ്. വ്യാപാര സ്ഥാപനങ്ങൾ രാവിലെ 10 മണിമുതൽ 5 മണിവരെ മാത്രമെ അടുത്ത ആഴ്ച മുതൽ തുറക്കാൻ അനുവദിക്കൂ. തിങ്കളാഴ്ച മുതലാണ് നിയന്ത്രണം. ആളുകൾ സംഘടിക്കുന്ന എല്ലാ പരിപാടികളും റദ്ദാക്കാൻ ജില്ലാ ഭരണകൂടം നിർദ്ദേശം നൽകിയിട്ടുണ്ട്. മതപരമായ ചടങ്ങുകൾ, ഉത്സവങ്ങൾ, പെരുന്നാൾ, വിവാഹം, ഗൃഹപ്രവേശം എന്നിവക്ക് വിലക്ക് ബാധകമാണ്. ഇത്തരം ചടങ്ങുകളിൽ 10 പേരിൽ കൂടാൻ അനവദിക്കില്ല. നിർദ്ദേശം ലംഘിക്കുന്നവർക്കെതിരെ കേസെടുക്കും.