ചെന്നൈ: തമിഴ്നാട്ടില് ഒരു ജാതി മതില് കൂടി തകര്ത്തു. കോയമ്പത്തൂരിലെ പന്നിമടയില് പത്തടി ഉയരത്തിലുളള മതിലാണ് തകര്ത്തത്. കൊന്തസാമി നഗറിലെ ദളിത് കോളനിയെയും തരിശുനിലത്തെയും വേര്തിരിച്ച് റിയല് എസ്റ്റേറ്റുകാര് കെട്ടിയ മതിലാണ് പഞ്ചായത്ത് പ്രസിഡന്റ് രത്നത്തിന്റെ നേതൃത്വത്തില് പൊളിച്ചുനീക്കിയത്. 120 ദളിത് കുടുംബങ്ങള് താമസിക്കുന്ന കോയമ്പത്തൂരിലെ പന്നിമട കൊന്തസാമി ദളിത് കോളനിയിലേക്കുളള പൊതുവഴി റിയല് ദല്ലാളുമാര് കെട്ടിയടച്ചത് ഏതാനും മാസങ്ങള്ക്കുമുന്പാണ്.
തന്തൈ പെരിയാര് ദ്രാവിഡ കഴകം(ടിപിഡികെ) മതില് പൊളിക്കണമെന്നാവശ്യപ്പെട്ട് ജില്ലാ കളക്ടര്ക്ക് നിവേദനം നല്കിയിരുന്നു. ദളിത് കോളനിക്ക് എതിര്വശമായി റിയല് എസ്റ്റേറ്റുകാര് പാര്പ്പിട സമൂച്ചയങ്ങള് നിര്മ്മിക്കുന്നുണ്ട്. അവിടെ നിന്നും നോക്കുമ്പോള് ദളിതരുടെ കോളനി കാണാതിരിക്കുക എന്ന ഉദ്ദേശത്തോടെയാണ് മതില് പണിതതെന്നാണ് ടിപിഡികെ ആരോപിക്കുന്നത്. അവര് സഞ്ചരിക്കുന്ന നാല് പഞ്ചായത്തു റോഡുകളും കെട്ടിയടച്ചതിനു പുറമേയാണ് പത്തടി ഉയരത്തില് മതില് കെട്ടിയത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
എന്നാല് തങ്ങള്ക്കും വഴി നടക്കണമെന്നും മതില് പൊളിക്കണമെന്നുമാവശ്യപ്പെട്ട് കോളനിയിലുളളവര് സമരം നടത്തി. കഴിഞ്ഞ ദിവസം ദളിത് നേതാക്കള് സമരം ശക്തമാക്കുകയും ഉദ്യോഗസ്ഥരെ കാണുകയും ചെയ്തു. ഭരണകൂടം മതില് പൊളിച്ചുനീക്കിയില്ലെങ്കില് കോളനിയിലുളളവര് സ്വയം മതില് തകര്ക്കുമെന്നും ടിപിഡികെ മുന്നറിയിപ്പ് നല്കി. ഇതേത്തുടര്ന്നാണ് പഞ്ചായത്ത് പ്രസിഡന്റിന്റെ നേതൃത്വത്തില് ആളുകളെത്തി ജെസിബി ഉപയോഗിച്ച് മതില് പൊളിച്ചുനീക്കിയത്.
കഴിഞ്ഞ ദിവസം മധുരയിലും ദളിതരുടെ പ്രക്ഷോഭം വിജയം കണ്ടിരുന്നു. ദളിതര്ക്ക് വര്ഷങ്ങളായി പ്രവേശനമില്ലാതിരുന്ന ക്ഷേത്രത്തിലേക്ക് പോരാട്ടത്തിലൂടെ അവര് പ്രവേശനം നേടിയെടുത്തു. ഇപ്പോള് തുടര്ച്ചയായി ദളിത് പ്രക്ഷോഭങ്ങള് തമിഴ്നാട്ടില് വിജയിക്കുന്നുണ്ട്.