കാന്: ലോക ചലച്ചിത്രോത്സവങ്ങളില് ഏറ്റവും വിഖ്യാതമായ ഫ്രാന്സിലെ കാന് (cannes film festival) ചലച്ചിത്രോത്സവം കൊറോണ രോഗ വ്യാപനത്തെ തുടര്ന്ന് മാറ്റി വെച്ചു. മെയ് 12 - മുതല് 23 വരെയാണ് കാന് ചലച്ചിത്രോത്സവം നടക്കാറുള്ളത്. യൂറോപ്പിലെയും ഫ്രാന്സിലെയും കൊറോണ രോഗ പ്രതിസന്ധിയെ തുടര്ന്നാണ് ലോകത്തിലെ തന്നെ ഏറ്റവും പഴക്കമുള്ള ചലച്ചിത്രോത്സവം മാറ്റിവെച്ചിരിക്കുന്നത്. പുതുക്കിയ തീയതി പിന്നീട് അറിയിക്കാമെന്ന് സംഘാടകര് പ്രസ്താവനയില് അറിയിച്ചു. സ്ഥിതിഗതികളില് മാറ്റം വന്നാല് ജൂണ് അവസാനമോ ജൂലൈ ആദ്യവാരമോ കാന് ചലച്ചിത്രോത്സവം നടക്കാന് സാധ്യയുണ്ടെന്ന് ഫെസ്റ്റിവല് സംഘാടകര് പ്രസ്താവനയില് പറയുന്നു.
കൊറോണ ബാധയെ തുടര്ന്ന് അതിഗുരുതരമായ പ്രതിസന്ധിയിലൂടെയാണ് ഫ്രാന്സ് കടന്നു പോകുന്നത്. കഴിഞ്ഞ 24 - മണിക്കൂറിനിടയില് 100 - ല് പരം ആളുകളാണ് കൊറോണയെ തുടര്ന്ന് ഫ്രാന്സില് മരണമടഞ്ഞത്. 14 ,459 - പേര്ക്കാണ് ഇതുവരെ ഫ്രാന്സില് കൊറോണ സ്ഥിരീകരിച്ചത്. 562- പേര് മരണമടഞ്ഞു. കഴിഞ്ഞ ദിവസങ്ങളിലാണ് ഏറ്റവുമധികം കൊറോണ മരണം ഫ്രാന്സില് റിപ്പോര്ട്ട് ചെയ്യപ്പെട്ടത്. ഒറ്റ ദിവസം കൊണ്ട് 108- പേരാണ് കൊറോണയെ തുടര്ന്ന് മരണമടഞ്ഞത്. ഇതേ തുടര്ന്ന് ഫ്രാന്സിലെ എല്ലാ മേഖലയും സ്തംഭിച്ച സാഹചര്യത്തിലാണ് കാനില് നടക്കുന്ന ചലച്ചിത്രോത്സവം മാറ്റിവെച്ചിരിക്കുന്നത്.
1946-ല് ആരംഭിച്ച കാന് ചലച്ചിത്രോത്സവം ലോകത്തെതന്നെ ഏറ്റവും പാരമ്പര്യവും പഴക്കവുമുള്ള ചലച്ചിത്രോല്സവമാണ്. അതിന്റെ 73 -ാമത് ഫെസ്റ്റിവലാണിപ്പോള് മാറ്റിവെച്ചിരിക്കുന്നത്. അമേരിക്കന് സ്മ്വിധായകനായ സ്പൈക്ക് ലീ യാണ് ഇത്തവണത്തെ ജൂറി അദ്ധ്യക്ഷന്. ലോകം കടുത്ത പ്രതിസന്ധിയിലൂടെ കടന്നുപോകുമ്പോള് മേള മാറ്റിവെക്കാനുള്ള ഫെസ്റ്റിവല് സംഘാടകരുടെ തീരുമാനത്തെ സ്പൈക്ക് ലീ അഭിനന്ദിച്ചു