പാട്ന: കേന്ദ്ര സര്ക്കാര് ജാതി സെന്സസ് നടത്തിയില്ലെങ്കില് സംസ്ഥാനം തങ്ങളുടേതായ രീതിയില് നടത്തുമെന്ന് ബീഹാര് മുഖ്യമന്ത്രി നിതീഷ് കുമാര്. സെന്സസ് നടത്തണമെന്ന് അവശ്യപ്പെട്ട് പ്രധാനമന്ത്രി നരേന്ദ്ര മോദിക്ക് കത്ത് നല്കിയിട്ടും ഇതുവരെ പ്രതികരണം ലഭിച്ചിട്ടില്ലെന്നും അദ്ദേഹം പറഞ്ഞു. ഇക്കാരണത്താലാണ് സംസ്ഥാന സര്ക്കാരിന് മറ്റ് വഴികള് ആലോചിക്കേണ്ടതായി വരുന്നതെന്നും നിതിഷ് കുമാര് വ്യക്തമാക്കി.
ജാതി അടിസ്ഥാനമാക്കിയുള്ള സെന്സസ് രാജ്യത്തിന് ആവശ്യമാണെന്നും, അത്തരത്തിലൊരു തീരുമാനം കേന്ദ്ര സര്ക്കാര് കൈകൊണ്ടാല് അതുവഴി എല്ലാ ജാതിയുള്ളവര്ക്കും പ്രത്യേക ക്ഷേമ പരിപാടികള് നടപ്പിലാക്കാന് സാധിക്കുമെന്നും നിതീഷ് കുമാര് പറഞ്ഞു. എന്നാല് ഇക്കാര്യത്തില് അന്തിമ തീരുമാനമെടുക്കേണ്ടത് കേന്ദ്ര സര്ക്കാര് ആണെന്ന നിലപാടിലായിരുന്നു നിതീഷ് കുമാര്. ഈ ആവശ്യത്തെക്കുറിച്ച് ചര്ച്ച ചെയ്യാന് പ്രധാനമന്ത്രി തയ്യാറാകാത്ത സാഹചര്യത്തിലാണ് മുഖ്യമന്ത്രി നിലപാട് വ്യക്തമാക്കിയിരിക്കുന്നത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
അതേസമയം, ഒബിസി വിഭാഗത്തിനുള്ള സെന്സസ് പൂര്ത്തിയാക്കിയാല് കേന്ദ്ര സര്ക്കാരിന് പൂര്ണ പിന്തുണ നല്കുമെന്ന് ബിഎസ്പി അധ്യക്ഷ മായാവതി വ്യക്തമാക്കിയിട്ടുണ്ട്. ഒബിസി വിഭാഗത്തിനുള്ള സെന്സസ് പൂര്ത്തിയാക്കിയാല് തന്റെ പാര്ട്ടി കേന്ദ്ര സര്ക്കാരിന് പാര്ലമെന്റിനകത്തും പുറത്തും പൂര്ണ പിന്തുണ നല്കും. ഒബിസി വിഭാഗത്തിന്റെ സെന്സസ് നടത്തണമെന്ന് കുറെ കാലങ്ങളായി ബിസ്പി ആവശ്യപ്പെട്ടിരുന്നു. ഇതിന്റെ അടിസ്ഥാനത്തിലാണ് മായാവതിയുടെ പ്രഖ്യാപനം.