ലഖ്‌നൌ: ഇന്ത്യന്‍ ദേശീയപ്രസ്ഥാനത്തിന്റെ ചരിത്രത്തിലെ പ്രധാനപ്പെട്ട സ്ഥലങ്ങളിലൊന്നായ അലഹബാദിനെ പ്രയാഗ് രാജ് ആക്കിമാറ്റിയ ഉത്തര്‍ പ്രദേശ്‌ മുഖ്യമന്ത്രി യോഗി ആദിത്യനാഥ് പേരുമാറ്റല്‍ തുടരുന്നു. സംസ്ഥാനത്തെ പുരാതനമായ പട്ടണങ്ങളുടേയും റെയില്‍വേ സ്റ്റേഷനുകളുടെയും പ്രദേശങ്ങളുടേയും ജില്ലകളുടെയും പേരുകളാണ് മാറ്റിക്കൊണ്ടിരിക്കുന്നത്. ഏറ്റവും പുതിയതായി ഇപ്പോള്‍ രണ്ടു സ്ഥലനാമങ്ങളാണ് അജണ്ടയിലുള്ളത്. മിര്‍സാപ്പൂരും, മിയാഗഞ്ചുമാണ് ഇപ്പോള്‍ അടിയന്തിരമായി പേരുമാറ്റത്തിന് നിര്‍ദ്ദേശിക്കപ്പെട്ടിരിക്കുന്നത്. മിര്‍സാപ്പൂരിന് വിന്ധ്യാ ധാം എന്നും മിയാഗഞ്ചിന് മായാഗഞ്ച് എന്നും പേരുനല്കാനാണ് ധാരണ.
കഴിഞ്ഞ നിയമസഭാ തെരഞ്ഞെടുപ്പ് കാലത്ത് യോഗി ആദിത്യനാഥ് പ്രചാരണ രംഗത്ത് മുന്നോട്ടുവെച്ച കാര്യമാണിതെന്ന് ബിജെപി എംഎല്‍എ ബംബാലാല്‍ പറഞ്ഞു. ആദ്യം പേരുമാറ്റുന്നത് മിയാഗഞ്ചിന്‍റെതാണ്. മുഖ്യമന്ത്രിയുടെ നിര്‍ദ്ദേശപ്രകാരമാണ് പേരുമാറ്റ വിഷയം ചര്‍ച്ചയാക്കിയത് എന്ന് ബംബാലാല്‍ എംഎല്‍എ പറഞ്ഞു. ഇത് സംബന്ധിച്ച കത്ത് ഉന്നാവ് ജില്ലാ മജിസ്ട്രേറ്റ് രവീന്ദ്ര കുമാറിന് എംഎല്‍എ കൈമാറി. എംഎല്‍എയുടെ കത്ത് പരിഗണിച്ച് ജില്ലാ ഭരണകൂടം സര്‍ക്കാരിന് കത്തയച്ചു. ഉടന്‍ തന്നെ തീരുമാനമുണ്ടാകുമെന്നാണ് പ്രതീക്ഷിക്കുന്നത്. ഇതോടൊപ്പം സംസ്ഥാന മന്ത്രി രമാശങ്കര്‍ സിംഗ് മിര്‍സാപ്പൂര്‍ പേരുമാറ്റം സജീവ ചര്‍ച്ചയിലേക്ക് കൊണ്ടുവന്നിട്ടുണ്ട്. വിന്ധ്യാ ധാം എന്ന പേരിലായിരിക്കും മിര്‍സാപ്പൂര്‍ ഇനി അറിയപ്പെടുക എന്നാണ് മന്ത്രി പറഞ്ഞത്. ഇതിനായുള്ള നടപടിക്രമങ്ങളും ഉടന്‍ പൂര്‍ത്തീകരിക്കാനാണ് സംസ്ഥാന സര്‍ക്കാറിന്‍റെ തീരുമാനം.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ചരിത്ര പ്രസിദ്ധമായ അലഹബാദിന് പുറമേ നിരവധി സ്ഥലങ്ങളുടെ പേരുമാറ്റം യോഗി സര്‍ക്കാരിന്റെ അജണ്ടയിലുണ്ട്. ഇതില്‍ ചിലതെല്ലാം നടപ്പിലാക്കിക്കഴിഞ്ഞിട്ടുണ്ട്. പണ്ഡിറ്റ്‌ ദയാല്‍ ഉപാധ്യായ റെയില്‍വേ സ്റ്റേഷനും അയോധ്യാ റെയില്‍വേ സ്റ്റേഷനും ഇത്തരത്തില്‍ പേരുമാറ്റപ്പെട്ടവയാണ്. യഥാക്രമം മുഗള്‍ സരായ്, ഫൈസാബാദ് എന്നിവയായിരുന്നു നേരത്തെയുള്ള പേരുകള്‍.
