ചെന്നൈ: തമിഴ്നാട്ടില് നീറ്റ് പരീക്ഷയെപ്പേടിച്ച് വിദ്യാര്ത്ഥിനി ആത്മഹത്യ ചെയ്തതിനുപിന്നാലെ ആത്മഹത്യകള്ക്കെതിരെ വീഡിയോ സന്ദേശവുമായി നടന് സൂര്യ. 'അച്ചമില്ലെ അച്ചമില്ലെ അച്ചമെന്പതില്ലയേ' (ഒന്നിനോടും ഭയമില്ല) എന്ന കവിത ചൊല്ലിയാണ് 1: 53 മിനിറ്റ് ദൈര്ഘ്യമുളള വീഡിയോ ആരംഭിക്കുന്നത്. എല്ലാ വിദ്യാര്ത്ഥികളും ഭയമില്ലാതെ ആത്മവിശ്വാസത്തോടെ ജീവിക്കണമെന്ന് ഒരു സഹോദരനെന്ന നിലയില് അപേക്ഷിക്കുകയാണ് എന്ന് സൂര്യ പറഞ്ഞു.
'നിങ്ങള്ക്ക് കഴിഞ്ഞ ആഴ്ച്ചയോ മാസമോ ഉണ്ടായിരുന്ന ഒരു പ്രശ്നം ഇപ്പോള് ഉണ്ടോ എന്ന് ആലോചിച്ചുനോക്കുക, തീര്ച്ചയായും അത് കുറഞ്ഞിരിക്കും ചിലപ്പോള് ആ പ്രശ്നം അവിടെ ഉണ്ടാവുകയേയില്ല. ഒരു പരീക്ഷ നിങ്ങളുടെ ജീവനേക്കാള് വലുതല്ല. നിങ്ങള്ക്ക് മാനസികമായി ബുദ്ധിമുട്ടുകളുണ്ടെങ്കില് നിങ്ങള്ക്ക് വിശ്വാസമുളള, ഏറ്റവും പ്രിയപ്പെട്ട മാതാപിതാക്കളോ, അധ്യാപകരോ സുഹൃത്തുക്കളോ ആരോടെങ്കിലും മനസുതുറന്ന് സംസാരിക്കു, ഭയം, നിരാശ, ഉത്കണ്ഠ, വിഷാദം ഇവയെല്ലാം കുറച്ചുനാള് കഴിയുമ്പോള് ഇല്ലാതാവും. എന്നാല് ആത്മഹത്യ ചെയ്യാനുളള തീരുമാനം നിങ്ങള് നിങ്ങളുടെ മാതാപിതാക്കള്ക്കും നിങ്ങളെ സ്നേഹിക്കുന്നവര്ക്കും നിങ്ങള് കൊടുക്കുന്ന ആജീവനാന്ത ശിക്ഷയാണ്' സൂര്യ പറഞ്ഞു.
താനും പരീക്ഷകളില് തോറ്റിട്ടുണ്ടെന്നും വളരെ മോശമായ മാര്ക്കുകള് വാങ്ങിയിട്ടുണ്ടെന്നും സൂര്യ പറഞ്ഞു. ജീവിതത്തില് ഓരോരുത്തര്ക്കും നേടാന് ഒരുപാടുകാര്യങ്ങള് മുന്നിലുണ്ടെന്നും ധൈര്യമായി മുന്നോട്ടുപോയാല് അവയെല്ലാം നേടാനാവുമെന്നും സൂര്യ കൂട്ടിച്ചേര്ത്തു.