ഡല്ഹി: പി എം കെയേഴ്സ് എന്നറിയപ്പെടുന്ന പ്രധാനമന്ത്രിയുടെ ദുരിതാശ്വാസ ഫണ്ട് സര്ക്കാര് ഫണ്ടല്ല എന്ന വിചിത്രവാദവുമായി കേന്ദ്ര സര്ക്കാര്. ഈ ഫണ്ടില് കേന്ദ്ര സര്ക്കാരിന് യാതൊരു നിയന്ത്രണവുമില്ലെന്നും അക്കാരണംകൊണ്ട് തന്നെ അതുമായി ബന്ധപ്പെട്ട കണക്കുകള് സര്ക്കാര് ഓഡിറ്റിന് വിധേയമാക്കേണ്ട കാര്യമില്ലെന്നും കേന്ദ്ര സര്ക്കാര് ഡല്ഹി ഹൈക്കോടതിയില് സത്യവാങ്ങ്മൂലം നല്കി. പി എം കെയേഴ്സിലെ പണത്തിന്റെ കണക്ക് വിവരാവകാശ നിയമപ്രകാരം വെളിപ്പെടുത്തേണ്ട കാര്യമില്ല. ഇത് ഭരണഘടനാ ചട്ടപ്രകാരം രൂപീകരിച്ചതല്ല-പ്രധാനമന്ത്രിയുടെ ഓഫീസ് അണ്ടര് സെക്രട്ടറി പ്രദീപ് കുമാര് ശ്രീവാസ്തവ സത്യവാങ്ങ്മൂലത്തില് ബോധിപ്പിച്ചു.
പി എം കെയേഴ്സ് ഫണ്ട് സര്ക്കാര് ഫണ്ടായി പ്രഖ്യാപിക്കണമെന്നാവശ്യപ്പെട്ട് സമ്യക് ഗാങ്ങ്വാള് എന്ന അഭിഭാഷകന് നല്കിയ ഹര്ജിയിലാണ് കേന്ദ്ര സര്ക്കാര് കോടതിയില് സത്യവാങ്ങ്മൂലം നല്കിയത്. പ്രധാനമന്ത്രി നരേന്ദ്ര മോദി ചെയര്മാനും ധനകാര്യ മന്ത്രി നിര്മ്മലാ സീതാരാമന്, പ്രതിരോധമന്ത്രി രാജ്നാഥ് സിംഗ് എന്നിവര് അംഗങ്ങളുമായി രൂപീകരിക്കപ്പെട്ട ട്രസ്റ്റാണ് പി എം കെയേഴ്സ്. ഇതിലേക്ക് പണം സംഭാവനയായി പിരിക്കുന്നതാകട്ടെ പ്രധാനമന്ത്രിയുടെ പ്രധാനമന്ത്രിയുടെ ഓഫീസ് വിലാസമായ സൌത്ത് ബ്ലോക്ക് അഡ്രസിലാണ്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
പാര്ലമെന്റംഗങ്ങളുടെ പ്രാദേശിക വികസന ഫണ്ട് രണ്ടുവര്ഷത്തേക്ക് മരവിപ്പിച്ച്, 365 കോടി രൂപ പിഎം കെയേഴ്സിലേക്ക് വകയിരുത്തിയത് നേരത്തെ വിവാദമായിരുന്നു. ഇതിനു പുറമേ വിദേശഫണ്ടും പൊതുമേഖലാ സ്ഥാപങ്ങളില് നിന്ന് സ്വീകരിക്കുന്ന പണവുമാണ് പിഎം കെയേഴ്സിലേക്ക് എത്തുന്നത്. പ്രധാനമന്ത്രിയുടെ പടവും രാജ്യത്തിന്റെ ഔദ്യോഗിക ചിഹ്നങ്ങളും ഉപയോഗിച്ചുതന്നെയാണ് പണസമാഹരണം നടത്തുന്നത്.