തിരുവനന്തപുരം: രാഷ്ട്രീയക്കാരില് ഏറ്റവും വില കുറഞ്ഞ പരാമര്ശം നടത്തുന്നയാള് സിപിഎം ആക്ടിംഗ് സെക്രട്ടറി എ വിജയരാഘവനാണെന്ന് പ്രതിപക്ഷ നേതാവ് വി ഡി സതീശന്. പെട്രോള് വില വര്ധനവിനെതിരെ യു ഡി എഫ് നടത്തിയ സൈക്കിള് റാലിയെ കളിയാക്കിയതിനെതിരെയായിരുന്നു വി ഡി സതീശന്റെ പ്രതികരണം. പ്രതിപക്ഷ എംഎല്എമാര് സ്ഥിരം സൈക്കിളില് ആണോ വരുന്നതെന്നായിരുന്നു വിജയരാഘവന്റെ ചോദ്യം.
കേരളത്തിലെ രാഷ്ട്രീയക്കാരില് ഏറ്റവും വില കുറഞ്ഞ രീതിയില് അഭിപ്രായപ്രകടനം നടത്തുന്നയാള് വിജയരാഘവനാണ്. സിപിഎം പ്രവര്ത്തകരെ പോലും നാണം കെടുത്ത തരത്തിലുള്ള വാക്കുകളാണ് അദ്ദേഹം ഉപയോഗിക്കുക. ഇത്തരം പരാമര്ശങ്ങളെ സിപിഎം ന്യായികരണ തൊഴിലാളികള്ക്ക് പോലും പ്രതിരോധിക്കാന് സാധിക്കാറില്ല. കേരളത്തില് നവോഥാന മതില് കെട്ടിയവരാണ് സിപിഎമ്മുകാര്. എന്നാല് കേരളത്തില് എല്ലാ ദിവസവും നവോത്ഥാന മതില് കെട്ടാറില്ലല്ലോ, അതുപോലെ തന്നെ സൈക്കിള് ചവിട്ടിയുള്ള പ്രതീകാത്മക പ്രതിക്ഷേധമായിരുന്നു സൈക്കിള് റാലിയും - വി ഡി സതീശന് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഇന്ധന നികുതി കുറയ്ക്കണമെന്ന് ആവശ്യപ്പെട്ട് കഴിഞ്ഞ ദിവസം പ്രതിപക്ഷ നേതാവ് വി ഡി സതീശന്റെ നേതൃത്വത്തില് സൈക്കിള് ചവിട്ടി യു ഡി എഫ് എം എല് എമാര് പ്രതിഷേധിച്ചിരുന്നു. ഇന്ധന വില വര്ധനവിനെ തുടര്ന്ന് ജനങ്ങള് ദുരിതത്തിലായ സാഹചര്യത്തില് നികുതി കുറക്കാന് തയ്യാറാകാത്ത സംസ്ഥാന സര്ക്കാരിനെതിരെയും നാമ മാത്രമായ കുറവ് വരുത്തിയ കേന്ദ്ര സര്ക്കാരിനെതിരെയുമാണ് യു ഡി എഫിന്റെ പ്രതിഷേധമെന്ന് വി ഡി സതീശന് പറഞ്ഞിരുന്നു. പിണറായി സര്ക്കാര് ഒരു നികുതിയും വര്ധിപ്പിച്ചിട്ടില്ല. ജനത്തെ തെറ്റിദ്ധരിപ്പിക്കാനുള്ള ശ്രമമാണ് നടക്കുന്നത്. കേരളത്തിലെ ജനങ്ങള്ക്ക് കൂടുതല് ആനുകൂല്യങ്ങള് നല്കുന്ന സര്ക്കാരാണ് ഇടതുപക്ഷത്തിന്റെത്. ഹിതപരിശോധന നടത്തിയതിന് ശേഷമാണ് എല്ഡിഎഫിനെ ജനങ്ങള് വീണ്ടും അധികാരത്തിലെത്തിച്ചതെന്നായിരുന്നു വിജയരാഘവന്റെ പ്രസ്താവന.