കോഴിക്കോട്: 'ചായകുടിക്കാന്‍ പോയപ്പോഴായിരുന്നില്ല അലനും താഹയും അറസ്റ്റിലായതെന്ന' മുഖ്യമന്ത്രി പിണറായി വിജയന്റെ പ്രസ്താവനക്കെതിരായ പ്രതീകാത്മക ചായകുടി പ്രതിഷേധത്തില്‍ പങ്കെടുത്ത് യുഎപിഎ കേസില്‍ അറസ്റ്റിലായ അലനും താഹയും. യുഎപിഎ അടക്കമുളള കരിനിയമങ്ങള്‍ക്കെതിരെ കോഴിക്കോട് കടപ്പുറത്തെ ഫ്രീഡം സ്‌ക്വയറില്‍ ബഹുജനകൂട്ടായ്മയുടെ നേതൃത്വത്തിലാണ് പ്രതിഷേധം സംഘടിപ്പിച്ചത്. പിണറായി വിജയന്റെ ചായകുടി പ്രസ്താവനയെ പരിഹസിച്ച് ചായ കുടിച്ചാണ് ഇരുവരും പ്രതിഷേധം നടത്തിയത്. ജയിലില്‍ അനുഭവിക്കേണ്ടിവന്ന മാനസിക പീഡനങ്ങള്‍ അലനും താഹയും പങ്കിട്ടു. യുഎപിഎ കേസില്‍ അറസ്റ്റിലായ ശേഷം ഇതാദ്യമായാണ് ഇരുവരും പൊതുപരിപാടിയില്‍ പങ്കെടുക്കുന്നത്.
മനുഷ്യാവകാശ പ്രവര്‍ത്തകന്‍ എ വാസുവാണ് പ്രതിഷേധപരിപാടി ഉദ്ഘാടനം ചെയ്തത്. ലഘുലേഖ കൈവശം വച്ചു എന്നാരോപിച്ചാണ് ഇരുവരെയും പൊലീസ് അറസ്റ്റ് ചെയ്തത്. എന്നാല്‍ വര്‍ഷങ്ങളായി ഈ ലഘുലേഖകള്‍ വില്‍ക്കുന്നയാളാണ് താനെന്നും അതിനെതിരെ ഒരു നടപടിയും ഉണ്ടായിട്ടില്ലെന്നും എ വാസു പറഞ്ഞു. അലനും താഹക്കുമെതിരെ യുഎപിഎ ചുമത്തി സി പി ഐ എം ഫാസിസ്റ്റ് സ്വഭാവമാണ് കാണിച്ചതെന്നും അദ്ദേഹം കൂട്ടിച്ചേര്‍ത്തു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
പന്തീരാങ്കാവ് യുഎപിഎ കേസ് അവസാനിക്കുന്നില്ലെന്നും ഇതേ കേസില്‍ അറസ്റ്റിലായ വിജിത്തും ഉസ്മാനും ഇപ്പോഴും ജയിലിലാണെന്നും അലനും താഹയും പറഞ്ഞു. മനുഷ്യാവകാശ ലംഘനങ്ങളുടെ കാര്യത്തില്‍ കേരളം ഒന്നാംസ്ഥാനത്താണെന്നും ഇരുവരും ആരോപിച്ചു. അലനും താഹക്കും മാവോയിസ്റ്റുകളുമായി ശക്തമായ ബന്ധമുണ്ടെന്ന എന്‍ ഐ എ വാദം തളളിയാണ് സുപ്രീംകോടതി ഇരുവര്‍ക്കും ജാമ്യം അനുവദിച്ചത്. പുസ്തകങ്ങളും ലഖുലേഖകളും പോസ്റ്ററുകളുമാണ് മാവോയിസ്റ്റ് ബന്ധമുണ്ടെന്നതിന്റെ പ്രധാന തെളിവുകളായി എന്‍ ഐ എ കോടതിയില്‍ ഹാജരാക്കിയത്. എന്നാല്‍ ഈ വാദങ്ങളെല്ലാം സുപ്രീംകോടതി തളളുകയായിരുന്നു.
