ഡല്‍ഹി: വിവാദ കാര്‍ഷിക നിയമങ്ങള്‍ പിന്‍വലിച്ചത് കര്‍ഷകരുടെയും രാജ്യത്തെ ജനങ്ങളുടെയും വിജയമാണെന്ന് കോണ്‍ഗ്രസ് നേതാവ് രാഹുല്‍ ഗാന്ധി. പ്രതിപക്ഷവുമായി ഒരു ചര്‍ച്ചയും നടത്താതെ വെറും നാല് മിനിറ്റിലാണ് കേന്ദ്രസര്‍ക്കാര്‍ നിയമങ്ങല്‍ പിന്‍വലിച്ചത്. ഇതിനര്‍ത്ഥം സര്‍ക്കാര്‍ ചര്‍ച്ചകളെ ഭയപ്പെടുന്നുവെന്നാണ്. തെറ്റ് ചെയ്തതുകൊണ്ടാണ് കേന്ദ്രം ചര്‍ച്ചകള്‍ക്ക് തയാറാവാത്തത്. മാപ്പ് പറഞ്ഞതോടെ പ്രധാനമന്ത്രി കുറ്റസമ്മതം നടത്തുകയായിരുന്നുവെന്നും സംസ്ഥാനങ്ങളില്‍ വരാനിരിക്കുന്ന നിയമസഭാ തെരഞ്ഞെടുപ്പ് മുന്നില്‍കണ്ടാണ് നിയമങ്ങള്‍ പിന്‍വലിച്ചതെന്നും രാഹുല്‍ ഗാന്ധി പറഞ്ഞു.
ബില്ലിന്‍മേല്‍ ചര്‍ച്ച വേണമെന്ന പ്രതിപക്ഷത്തിന്റെ ആവശ്യം നിരാകരിച്ച് ശബ്ദവോട്ടോടുകൂടിയാണ് ബില്‍ ഇരുസഭകളിലും പാസാക്കിയത്. മൂന്ന് പേജുളള ബില്‍ കൃഷി മന്ത്രി നരേന്ദ്രസിംഗ് തോമറാണ് അവതരിപ്പിച്ചത്. രാഷ്ട്രപതി ഒപ്പുവയ്ക്കുന്നതോടുകൂടി നിയമങ്ങള്‍ റദ്ദാക്കുന്നതുമായി ബന്ധപ്പെട്ട എല്ലാ നടപടികളും പൂര്‍ത്തിയാകും. നിയമങ്ങള്‍ എന്തുകൊണ്ടാണ് പിന്‍വലിക്കുന്നതെന്ന് വ്യക്തമാക്കിയിട്ടുണ്ട്. പ്രധാനമന്ത്രി നരേന്ദ്രമോദിയും വിഷയത്തില്‍ വിശദീകരണം നല്‍കിയിട്ടുണ്ട് അതിനാല്‍ ഇനി അതിനെക്കുറിച്ച് ചര്‍ച്ച വേണ്ട എന്നാണ് കേന്ദ്രത്തിന്റെ നിലപാട്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
രാവിലെ പാര്‍ലമെന്റിന്റെ ശീതകാല സമ്മേളനം ആരംഭിച്ചതുമുതല്‍ കാര്‍ഷിക നിയമങ്ങള്‍ പിന്‍വലിക്കുന്ന ബില്ലുമായി ബന്ധപ്പെട്ട് ചര്‍ച്ച നടത്തണമെന്നാവശ്യപ്പെട്ട് കോണ്‍ഗ്രസടക്കമുളള പ്രതിപക്ഷ പാര്‍ട്ടികള്‍ ബഹളം ആരംഭിച്ചിരുന്നു. തുടര്‍ന്ന് നിര്‍ത്തിവെച്ച സഭ 12 മണിക്കാണ് പുനരാരംഭിച്ചത്. തുടര്‍ന്നാണ് ബില്ല് പാസാക്കിയത്. ഏതു വിഷയത്തിലും കേന്ദ്രം ചര്‍ച്ചക്ക് തയാറാണെന്നും എല്ലാ ചോദ്യങ്ങള്‍ക്കും സര്‍ക്കാര്‍ ഉത്തരം നല്‍കുമെന്നും രാവിലെ പ്രധാനമന്ത്രി മാധ്യമ പ്രവര്‍ത്തകരോട് പറഞ്ഞിരുന്നു.
