കോഴിക്കോട്: വഖഫ് വിഷയത്തിലും മുസ്ലീം ലീഗിനെ കുറിച്ചുള്ള അഭിപ്രായത്തിലും മുഖ്യമന്ത്രി പിണറായി വിജയനോട് പ്രതികരിച്ച് ലീഗ് നേതാവ് ഡോ.എം.കെ. മുനീര്‍ എം.എല്‍.എ. ധാര്‍ഷ്ട്യം മുസ്ലിം ലീഗിനോട് വേണ്ട. മുഖ്യമന്ത്രിയുടെ ധാര്‍ഷ്ട്യം സ്വന്തം വീട്ടില്‍ എടുത്താല്‍ മതി- ഡോ.എം.കെ. മുനീര്‍ പറഞ്ഞു. മുഖ്യമന്ത്രി തരംതാണ രാഷ്ട്രീയം കളിയാക്കരുത്. ഇന്ത്യന്‍ യൂണിയന്‍ മുസ്ലീം ലീഗ് പ്രതിനിധികള്‍ ഓടിളക്കിയല്ല നിയമസഭയിലെത്തിയത്- എം.കെ. മുനീര്‍ കൂട്ടിച്ചേര്‍ത്തു. മുസ്ലിം ലീഗ് മിണ്ടണ്ട എന്ന് പറഞ്ഞാല്‍ സഭയില്‍ ഇടപെടേണ്ട എന്നാണോയെന്നും മുനീര്‍ ചോദിച്ചു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഇന്ത്യന്‍ യൂണിയന്‍ മുസ്ലീം ലീഗ് എന്ത് ചെയ്യണമെന്നതിന് എ.കെ.ജി സെന്ററിലെ തിട്ടൂരം വേണ്ട. ലീഗ് രാഷ്ട്രീയപാര്‍ട്ടിയാണോ അതോ മതസംഘടനയാണോ, എന്ന മുഖ്യമന്ത്രിയുടെ ചോദ്യത്തിന്, തങ്ങള്‍ രാഷ്ട്രീയ പാര്‍ട്ടി തന്നെയാണെന്നും വഖഫ് ബോര്‍ഡ് നിയമനം പി എസ് സിയ്ക്ക് വിടുന്നതിനെതിരെയുള്ള സമരം ശക്തമാക്കുമെന്നും മുനീര്‍ പറഞ്ഞു. വഖഫ് ബോര്‍ഡ് നിയമനം പി എസ് സിയ്ക്ക് വിടുന്നതിനെ സംബന്ധിച്ച് ലീഗിന്റെ അഭിപ്രായം ആരു നോക്കുന്നുവെന്നും ലീഗ് ഒരു സമുദായത്തിന്റെയാകെ അട്ടിപ്പേറവകാശം ഏറ്റെടുക്കാന്‍ നോക്കണ്ട എന്നും കഴിഞ്ഞ ദിവസം മുഖ്യമന്ത്രി പ്രസ്താവിച്ചിരുന്നു. ഇതിനോടുള്ള പ്രതികരണമാണ് മുന്‍ പ്രതിപക്ഷ ഉപനേതാവ് കൂടിയായ എം കെ മുനീര്‍ നടത്തിയത്.
