ചണ്ഡീഗഡ്: പുതിയ രാഷ്ട്രീയ പാര്‍ട്ടി രൂപീകരിച്ച് കര്‍ഷക നേതാവ് ഗുര്‍ണാം സിംഗ് ചദുനി. 'സംയുക്ത സംഘര്‍ഷ് പാര്‍ട്ടി' എന്നാണ് പാര്‍ട്ടിയുടെ പേരെന്നും വരുന്ന പഞ്ചാബ് നിയമസഭാ തെരഞ്ഞെടുപ്പില്‍ പാര്‍ട്ടി സ്ഥാനാര്‍ത്ഥികള്‍ മത്സരിക്കുമെന്നും ഗുര്‍ണാം സിംഗ് പറഞ്ഞു. ചണ്ഡീഗഡില്‍ നടന്ന വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം. റദ്ദാക്കപ്പെട്ട വിവാദ കാര്‍ഷിക നിയമങ്ങള്‍ക്കെതിരെ ഒരുവര്‍ഷത്തിലേറെയായി പ്രതിഷേധിച്ച സംയുക്ത കിസാന്‍ മോര്‍ച്ചയുടെ പ്രധാനപ്പെട്ട നേതാക്കളില്‍ ഒരാളാണ് ഗുര്‍ണാം സിംഗ് ചദുനി.
'ഇന്ന് മിക്ക രാഷ്ട്രീയ പാര്‍ട്ടികളും പണമുളളവരാണ്. പാവപ്പെട്ടവരുടെ അവകാശങ്ങളെ അവഗണിച്ച് മുതലാളിമാര്‍ക്ക് അനുകൂലമായ നടപടികളാണ് രാജ്യത്തെ സര്‍ക്കാര്‍ എടുത്തുകൊണ്ടിരിക്കുന്നത്. ജാതിക്കും മതത്തിനും അതീതമായിരിക്കും പാര്‍ട്ടിയുടെ നിലപാടുകള്‍. എല്ലാ ഗ്രാമങ്ങളിലെയും നഗരങ്ങളിലെയും കര്‍ഷകര്‍ക്കും തൊഴിലാളികള്‍ക്കും വേണ്ടിയായിരിക്കും പാര്‍ട്ടി നിലകൊളളുക' -ഗുര്‍നാം സിംഗ് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
കഴിഞ്ഞ ദിവസം, തെരഞ്ഞെടുപ്പുകളില്‍ മത്സരിക്കാനില്ലെന്ന് കര്‍ഷക നേതാവ് രാകേഷ് ടികായത്ത് വ്യക്തമാക്കിയിരുന്നു. താന്‍ ഒരു പാര്‍ട്ടിയുടെയും അംഗമല്ലെന്നും തന്റെ ചിത്രം ഒരു രാഷ്ട്രീയ പാര്‍ട്ടിയും തെരഞ്ഞെടുപ്പ് പ്രചരണങ്ങള്‍ക്കായി ഉപയോഗിക്കരുതെന്നുമാണ് രാകേഷ് ടികായത്ത് പറഞ്ഞത്.
