കൊച്ചി: രാഷ്ട്രീയത്തിനപ്പുറം അന്തരിച്ച പി ടി തോമസിനോട് മുഖ്യമന്ത്രി പിണറായി വിജയന് വാത്സല്യമായിരുന്നു എന്ന് ഭാര്യ ഉമാ തോമസ് പറഞ്ഞു. പി ടി തോമസിന്‍റെ മണ്ഡലമായ തൃക്കാക്കരയില്‍ മത്സരിക്കുന്നതിനെ കുറിച്ച് താന്‍ ആലോചിച്ചിട്ടേയില്ലായെന്നും അതിനു പറ്റിയ മാനസ്കാവസ്ഥയില്‍ താന്‍ എത്തിയിട്ടില്ലെന്നും മാതൃഭൂമി ചാനലിനു നല്‍കിയ അഭിമുഖത്തില്‍ ഉമ വ്യക്തമാക്കി. തനിക്ക് സംഭവിച്ചത് തീരാത്ത നഷ്ടമാണ്. അതില്‍ നിന്നും പുറത്തുകടക്കേണ്ടതുണ്ട് ഉമാ തോമസ് പറഞ്ഞു.
ഓരോ കാര്യത്തിലും സ്വന്തം നിലപാട് സ്വീകരിച്ചതിന്റെ പേരില്‍ പല പ്രതിഷേധങ്ങളും പി ടി തോമസിന് നേരിടേണ്ടിവന്നിട്ടുണ്ട്. അത് അദ്ദേഹത്തെ ഏറെ വേദനിപ്പിച്ചിരുന്നുവെന്നും ഉമ പറഞ്ഞു. പി ടി തോമസിനെതിരെ വന്നത് വെറും നാലഞ്ച് അച്ചന്മാര്‍ മാത്രമാണ്. എന്നാല്‍ അതിലേറെപ്പേര്‍ അദ്ദേഹത്തോടൊപ്പമുണ്ടായിരുന്നു. തെരഞ്ഞെടുപ്പുകാലങ്ങളില്‍ നടന്ന പ്രചാരണങ്ങള്‍ പി ടിയെ വേദനിപ്പിച്ചിരുന്നുവെന്നും ഉമ കൂട്ടിച്ചേര്‍ത്തു. എന്നാല്‍ പരിസ്ഥിതിയുമായി ബന്ധപ്പട്ട് പി തി തോമസ് പറഞ്ഞ കാര്യങ്ങള്‍ പിന്നീട് ആളുകള്‍ക്ക് ബോധ്യപ്പെട്ടുവെന്നും ഉമ പറഞ്ഞു.
തൃക്കാക്കരയില്‍ മത്സരിക്കുന്നതിനെ കുറിച്ച് ചിന്തിച്ചിട്ടില്ല. രാഷ്ട്രീയ കാര്യങ്ങളെകുറിച്ച് ഇപ്പോള്‍ ഒന്നും ആലോചിച്ചിട്ടില്ല എന്നും ഉമ കൂട്ടിച്ചേര്‍ത്തു.
