തിരുവനന്തപുരം: നിലവിലെ ചിതറിക്കിടക്കുന്ന അവസ്ഥ മാറ്റി, തദ്ദേശ ഭരണ സ്ഥാപങ്ങളെ ഒറ്റ വകുപ്പിന് കീഴില് കൊണ്ടുവരുന്ന പരിഷ്കാരം അടുത്തമാസം ( ഫെബ്രുവരി) 1-ാം തീയതിയോടെ സാക്ഷാത്കരിക്കുമെന്ന് തദ്ദേശ സ്വയംഭരണ വകുപ്പ് മന്ത്രി എം വി ഗോവിന്ദന് പറഞ്ഞു. ഗ്രാമപഞ്ചായത്തിനും ബ്ലോക്ക് പഞ്ചായത്തിനും നഗരകാര്യത്തിനും എന്ജിനിയറിങ്ങിനും നഗരഗ്രാമാസൂത്രണത്തിനും വ്യത്യസ്ത വകുപ്പുകളും ജില്ലാ പഞ്ചായത്തുകള്ക്ക് ഗവണ്മെന്റ് സെക്രട്ടറിയേറ്റുമെന്നതാണ് നിലവിലുള്ള അവസ്ഥ. ഓരോ തുരുത്തുകളിലെന്ന പോല വിവിധ ഡയറക്ടറേറ്റുകളും അനുബന്ധ ഏജന്സികളുമായി പരന്നുകിടക്കുന്ന, ഒരേസ്വഭാവമുള്ള അഞ്ചുവകുപ്പുകളെ ഏകോപിപ്പിച്ച് തദ്ദേശ സ്വയംഭരണ വകുപ്പ് എന്ന ഒറ്റവകുപ്പാക്കും.
ഒരേസ്വഭാവമുള്ള അഞ്ചുവകുപ്പുകളെ ഏകോപിപ്പിച്ച് തദ്ദേശ സ്വയംഭരണ വകുപ്പ് എന്ന ഒറ്റവകുപ്പായി മാറ്റുന്നതോടെ സമൂഹത്തിന്റെ അടിത്തട്ടിലുള്ള ജനങ്ങള്ക്ക് ഏറ്റവും സുതാര്യമായ സേവനം വേഗത്തില് ലഭ്യമാവുമെന്ന് ഉറപ്പുവരുത്താനും സൗഹാര്ദ്ദപരമായ സമീപനങ്ങളിലൂന്നുന്ന ജനകീയ ഉദ്യോഗസ്ഥ സംവിധാനം രൂപപ്പെടുത്താനും വകുപ്പ് സംയോജനത്തിലൂടെ ലക്ഷ്യമിടുന്നത് എന്ന് മന്ത്രി ഗോവിന്ദന് പറഞ്ഞു. സംയോജനവുമായി ബന്ധപ്പെട്ട്, ഉദ്യോഗസ്ഥ പുനര്വിന്യാസം സംബന്ധിച്ചും സംസ്ഥാന-ജില്ലാ ഓഫീസുകളുടെ ഭരണനിര്വ്വഹണ ഉത്തരവാദിത്തങ്ങള് നിശ്ചയിക്കാനും ഉദ്യോഗസ്ഥരെ ബോധവല്ക്കരിച്ച് ഒറ്റവകുപ്പിന് കീഴില് സജ്ജരാക്കുന്നതിനും വേണ്ടി കൊട്ടാരക്കര സി എച്ച് ആര് ഡിയില് സംഘടിപ്പിച്ച ശില്പ്പശാല ഉദ്ഘാടനം ചെയ്യുകയായിരുന്നു മന്ത്രി.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഫെബ്രുവരിമാസം മൂന്നാം വാരത്തില് വകുപ്പ് ഏകീകരണത്തിന്റെ പ്രഖ്യാപനവും സംസ്ഥാന ഓഫീസിന്റെ ഉദ്ഘാടനവും നിര്വ്വഹിക്കും. വകുപ്പ് ഏകീകരണവുമായി ബന്ധപ്പെട്ട സ്പെഷ്യല് റൂള്സിന്റെ പി എസ് സി പരിശോധന ഏകദേശം പൂര്ത്തിയായി. അടുത്തുതന്നെ അത് സംബന്ധിച്ച അംഗീകാരം പി എസ് സി യില് നിന്ന് ലഭിക്കുമെന്നാണ് പ്രതീക്ഷിക്കുന്നത്. സംസ്ഥാന സര്ക്കാരിന്റെ ഒന്നാം വാര്ഷികത്തോടനുബന്ധിച്ചുള്ള നൂറുദിന പരിപാടിയില് ഉള്പ്പെടുത്തി വകുപ്പ് ഏകീകരണം നിലവില് വരുന്നത്. നേരത്തെ പഞ്ചായത്ത്, കോര്പറേഷന് എന്നിവ വിഭജിച്ച് യു ഡി എഫ് സര്ക്കാര് രണ്ടു വകുപ്പുകളാക്കിയിരുന്നു. ഇത് പിന്നീട് വന്ന എല് ഡി എഫ് സര്ക്കാര് പൂര്വ്വസ്ഥിതിയിലേക്ക് മാറ്റുകയാണുണ്ടായത്.