ഡല്ഹി: ഈ മാസം അഞ്ചിന് രാത്രി ലൈറ്റണച്ച് മെഴുകുതിരി കത്തിക്കാനുള്ള പ്രധാനമന്ത്രിയുടെ ആഹ്വാനത്തെ കണക്കിന് കളിയാക്കി മുന് ധനകാര്യ മന്ത്രിയും കോണ്ഗ്രസ്സിന്റെ മുതിര്ന്ന നേതാവുമായ പി.ചിദംബരം രംഗത്തുവന്നു. ‘’പ്രധാനമന്ത്രീ ഞങ്ങള് മെഴുകുതിരി കത്തിച്ചോളാം, താങ്കള് രാജ്യത്തെ സാമ്പത്തിക വിദഗ്ദരുടെ ബുദ്ധിപൂര്വ്വമായ ഉപദേശങ്ങള് സ്വീകരിക്കൂ’’-എന്ന് കളിയാക്കിക്കൊണ്ടാണ് മുന് ധനകാര്യ മന്ത്രി ട്വിറ്ററില് തന്റെ വിയോജിപ്പുകള് വ്യക്തമാക്കുന്നത്.
''ധനകാര്യമന്ത്രി നിര്മലാ സീതാരാമന് വിട്ടുപോയ വിഭാഗങ്ങളെകൂടി ഉള്പ്പെടുത്തി പുതിയൊരു പാക്കേജ് പ്രതീക്ഷിച്ചിരുന്ന ഞങ്ങളോട് വിളക്ക് തെളിയിക്കാനാണ് ആവശ്യപ്പെട്ടിരിക്കുന്നത്. ഞങ്ങള് അത് അനുസരിച്ചോളാം. പകരം ബുദ്ധിപരമായി അഭിപ്രായം പറയുന്ന ആരോഗ്യ, സാമ്പത്തിക വിദഗ്ദരുടെ അഭിപ്രായങ്ങള് അങ്ങ് സ്വീകരിക്കൂ''- എന്ന് ചിദംബരം ട്വിറ്ററില് കുറിച്ചു.
ഈ രാജ്യത്തെ ഏറ്റവും കഷ്ടതയനുഭവിക്കുന്ന ജനങളുടെ പ്രയാസങ്ങള് കുറയ്ക്കാന് ആവശ്യമായ എന്തെങ്കിലും നടപടികള് പ്രതീക്ഷിക്കുന്നവര് പ്രധാനമന്ത്രിയുടെ പുതിയ ആഹ്വാനത്തിലൂടെ നിരാശരാവുകയാണെന്നും മുന് ധനകാര്യ മന്ത്രി പറഞ്ഞു.
ഈ മാസം അഞ്ചിനു (ഞായറാഴ്ച) രാത്രി 9 - മണിക്ക് 9 - മിനുട്ട് ലൈറ്റണച്ച് മെഴുകുതിരിയോ മൊബൈല് ഫോണ് ലൈറ്റോ കത്തിച്ചുപിടിക്കാനാണ് പ്രധാനമന്ത്രി നരേന്ദ്ര മോദി വീഡിയോ സന്ദേശത്തിലൂടെ രാജ്യത്തെ ജനങ്ങളോട് ആവശ്യപ്പെട്ടിരിക്കുന്നത്.