ഇടുക്കി: കെ പി സി സി പ്രസിഡന്റ് കെ സുധാകരനെതിരെ വിവാദ പരാമര്ശവുമായി സിപിഎം ഇടുക്കി ജില്ലാ സെക്രട്ടറി സി വി വര്ഗീസ്. സിപിഎം കൊടുത്ത ഭിക്ഷയാണ് സുധാകരന്റെ ജീവിതമെന്നും നികൃഷ്ട ജീവിയെ കൊല്ലാന് പാര്ട്ടിക്ക് താത്പര്യമില്ലായെന്നുമാണ് സി വി വര്ഗീസ് പ്രസംഗിച്ചത്. സിപിഎമ്മിന്റെ കരുത്തിനെക്കുറിച്ച് കോണ്ഗ്രസിന് ധാരണയുണ്ടായിരിക്കണമെന്നും സി വി വര്ഗീസിന്റെ പ്രസംഗത്തില് പറയുന്നു. കോൺഗ്രസിന്റെ കൊലപാതക രാഷ്ട്രീയത്തിനെതിരെ ചെറുതോണിയിൽ സിപിഎം നടത്തിയ പ്രതിഷേധ സംഗമത്തിൽ ആയിരുന്നു സി വി വര്ഗീസിന്റെ വിവാദ പരാമർശം.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഇടുക്കി ഗവണ്മെന്റ് എഞ്ചിനീയറിംഗ് കോളേജിലെ എസ് എഫ് ഐ പ്രവര്ത്തകന് ധീരജിന്റെ കൊലപാതകത്തില് പ്രതി നിഖില് പൈലിയെ ന്യായീകരിച്ച് സുധാകരന് കഴിഞ്ഞ ദിവസം രംഗത്തെത്തിയിരുന്നു. ധീരജിനെ കുത്തിയത് നിഖില് പൈലി അല്ല. ജയിലില് കിടക്കുന്നത് നിരപരാധികളാണ്. നിഖില് ധീരജിനെ കുത്തുന്നത് ആരും കണ്ടിട്ടില്ലെന്നും സത്യം പുറത്തുകൊണ്ടുവരണമെന്നും കെ സുധാകരന് പറഞ്ഞിരുന്നു. ഇതിനു നല്കിയ മറുപടി പ്രസംഗത്തിലാണ് സി വി വര്ഗീസിന്റെ വിവാദ പരാമര്ശമുണ്ടായിരിക്കുന്നത്. നേരത്തെ ഇടുക്കി ജില്ലാ സെക്രട്ടറിയായിരുന്ന എം എം മണി നടത്തിയ കൊലപാതക പരാമർശവും വലിയ വിവാദമായിരുന്നു. കഴിഞ്ഞ ഒരാഴ്ചയായി സിപിഎം സംസ്ഥാനത്തിന്റെ വിവിധയിടങ്ങളില് കൊലപാതക രാഷ്ട്രീയത്തിനെതിരെ പ്രതിഷേധ പരിപാടികള് സംഘടിപ്പിക്കുന്നുണ്ട്.