ഡല്ഹി: മലയാളത്തിലെ പ്രമുഖ വാര്ത്താ ചാനലായ മീഡിയവണിന് വിലക്ക് ഏര്പ്പെടുത്തിയ കേന്ദ്ര സര്ക്കാര് നടപടിക്കെതിരെ മാനേജ്മെന്റ് നല്കിയ ഹര്ജി അടുത്ത ദിവസം സുപ്രീം കോടതി പരിഗണിക്കാനിരിക്കെയാണ് കേന്ദ്ര സര്ക്കാര് അഭിഭാഷകന് മറുപടി സത്യവാങ്ങ്മൂലത്തിന് കൂടുതല് സമയം ചോദിച്ച് കോടതിയെ സമീപിച്ചത്. വിഷയം സംബന്ധിച്ച് തീരുമാനമെടുക്കുന്നത് ഉന്നതങ്ങളിലാണ് എന്നും കോടതിയില് മറുപടി സത്യവാങ്ങ്മൂലം സമര്പ്പിക്കാന് നാല് ആഴ്ചത്തെ സമയംകൂടി അനുവദിക്കണമെന്നുമാണ് കേന്ദ്ര സര്ക്കാര് അഭിഭാഷകനായ അമരീഷ് കുമാര് സുപ്രീം കോടതി രജിസ്ട്രാര്ക്ക് നല്കിയ കത്തില് ആവശ്യപ്പെട്ടിരിക്കുന്നത്.
നേരത്തെ മാര്ച്ച് 30-വരെയാണ് സുപ്രിംകോടതി സമയം അനുവദിച്ചിരുന്നത്. സംപ്രേക്ഷണ വിലക്ക് ചോദ്യംചെയ്ത് നല്കിയ ഹര്ജികള് നാളെയാണ് (വ്യാഴം) ജസ്റ്റിസുമാരായ ഡി. വൈ ചന്ദ്രചൂഡ്, സഞ്ജീവ് ഖന്ന, സൂര്യ കാന്ത് എന്നിവര് അടങ്ങിയ ബെഞ്ച് പരിഗണിക്കേണ്ടിയിരുന്നത്. ആഭ്യന്തര വകുപ്പിന്റെ നിര്ദ്ദേശപ്രകാരമാണ് അഭിഭാഷകന് ഇത്തരത്തില് കത്ത് നല്കിയത് എന്നാണ് നിഗമനം.