തിരുവനന്തപുരം: കോണ്ഗ്രസ് വിട്ട് വരുന്നവര് വഴിയാധാരമാവില്ലെന്ന് സി പി എം സംസ്ഥാന സെക്രട്ടറി കോടിയേരി ബാലകൃഷ്ണന്. സിപിഎമ്മുമായി സഹകരിച്ചതിന്റെ പേരില് കോണ്ഗ്രസ് ആരെയെങ്കിലും പുറത്താക്കിയാല് അവര്ക്ക് സി പി എം അഭയം നല്കുമെന്നും അദ്ദേഹം പറഞ്ഞു. കോണ്ഗ്രസ് കെ വി തോമസിനെ പുറത്താക്കിയാല് സി പി എം അദ്ദേഹത്തിന് അഭയം നല്കും. കെ വി തോമസിനെതിരെ നടപടിയെടുത്ത കോണ്ഗ്രസ് ജനങ്ങള്ക്കിടയില് ഒറ്റപ്പെടും എന്നും കോടിയേരി ബാലകൃഷ്ണന് പറഞ്ഞു.
അതേസമയം, സിപിഎമ്മിലേക്ക് സ്വാഗതം ചെയ്ത കോടിയേരി ബാലകൃഷ്ണനെ തളളി കെ വി തോമസ് രംഗത്തെത്തി. വീടില്ലാത്തവര്ക്കാണ് അഭയം നല്കേണ്ടത്. ഞാനിപ്പോഴും കോണ്ഗ്രസ് വീട്ടില്തന്നെയാണുളളത്. സ്വന്തം വീട്ടില് നില്ക്കുന്നതില് അപമാനം തോന്നേണ്ട കാര്യമില്ല എന്നാണ് കെ വി തോമസ് പറഞ്ഞത്. കോണ്ഗ്രസ് അച്ചടക്ക സമിതിയുടെ ശുപാര്ശ സംബന്ധിച്ച് തനിക്കൊന്നും അറിയില്ലെന്നും മാധ്യമവാര്ത്തകളുടെ അടിസ്ഥാനത്തില് പ്രതികരിക്കുന്നില്ലെന്നും അദ്ദേഹം പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
തൃക്കാക്കര ഉപതെരഞ്ഞെടുപ്പ് സമയത്തുതന്നെ കെ വി തോമസിനെ ഇടതുപക്ഷത്തെത്തിക്കാനാണ് സിപിഎമ്മിന്റെ ശ്രമം. എന്നാല് കോണ്ഗ്രസ് അദ്ദേഹത്തെ പാര്ട്ടിയില് നിന്ന് പുറത്താക്കാതിരിക്കുന്നതും വിഷയത്തില് കെ വി തോമസ് നിലപാടെടുക്കാത്തതും സിപിഎമ്മിനെ ആശയക്കുഴപ്പത്തിലാക്കുന്നുണ്ട്. മുഖ്യമന്ത്രി പിണറായി വിജയനും കോടിയേരി ബാലകൃഷ്ണനുമടക്കം കെ വി തോമസിനായി സംസാരിച്ചതോടെ അദ്ദേഹത്തെ ഉടന് പുറത്താക്കുക എന്ന തീരുമാനം കോണ്ഗ്രസ് മാറ്റി. തെരഞ്ഞെടുപ്പിനുമുന്പ് സിപിഎമ്മിന് ഒരു രാഷ്ട്രീയ ആയുധം നല്കേണ്ടതില്ലെന്ന നിലപാടിലാണ് കോണ്ഗ്രസ്.