കൊച്ചി: തൃക്കാക്കര ഉപതെരഞ്ഞെടുപ്പില്‍ യുഡിഎഫ് ഉജ്ജ്വല വിജയം കൈവരിച്ചതിനുപിന്നാലെ പ്രതികരണവുമായി കോണ്‍ഗ്രസ് എംപി കെ മുരളീധരന്‍. യുഡിഎഫ് പരാജയങ്ങളില്‍ നിന്ന് വിജയങ്ങളിലേക്കുളള യാത്ര തുടങ്ങിയെന്ന് കെ മുരളീധരന്‍ പറഞ്ഞു. ജാതികള്‍ക്കും മതങ്ങള്‍ക്കും അതീതമായി കോണ്‍ഗ്രസിന് വോട്ട് ലഭിച്ചെന്നും ഭരണത്തുടര്‍ച്ചയെത്തുടര്‍ന്ന് ഇടതുപക്ഷത്തിനുണ്ടായ ധാര്‍ഷ്ട്യത്തിന് കിട്ടിയ തിരിച്ചടിയാണ് കോണ്‍ഗ്രസിന്റെ വിജയമെന്നും മുരളീധരന്‍ പറഞ്ഞു.
"തൃക്കാക്കരയില്‍ യുഡിഎഫ് വിജയിച്ചപ്പോള്‍ എല്‍ഡിഎഫ് പറയുകയാണ് അത് ഞങ്ങളുടെ സിറ്റിംഗ് മണ്ഡലമാണെന്ന്. പിന്നെന്തിനാണ് അവിടെ വന്ന് മുഖ്യമന്ത്രിയും മറ്റ് മന്ത്രിമാരും ഇത്രയധികം കോലാഹലങ്ങളുണ്ടാക്കിയത്? പ്രതിപക്ഷത്തെ നശിപ്പിക്കാന്‍ എന്തും വിളിച്ചുപറയുന്ന രീതിയായിരുന്നു മുഖ്യമന്ത്രി പിണറായി വിജയന്‍ സ്വീകരിച്ചത്. ഇടതുമുന്നണി കമ്മ്യൂണിസ്‌ററ് പ്രത്യയശാസ്ത്രം പണയംവെച്ചിരുന്നു. അവരുടെ സ്ഥാനാര്‍ത്ഥി നിര്‍ണയത്തിലടക്കം പാര്‍ട്ടിക്കകത്തുനിന്ന് അതൃപ്തികളുണ്ടായിരുന്നു. കോണ്‍ഗ്രസ് നേതൃത്വത്തിന്റെ കൂട്ടായ വിജയമാണ് തൃക്കാക്കരയിലേത്'-കെ മുരളീധരന്‍ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
പാര്‍ലമെന്റ് തെരഞ്ഞെടുപ്പില്‍ യുഡിഎഫിന് വന്‍ വിജയമുണ്ടായപ്പോള്‍ ചിലര്‍ക്ക് അഹങ്കാരമുണ്ടായി. അതിന് യുഡിഎഫിന് തിരിച്ചടിയുണ്ടാവുകയും ചെയ്തു. അതുകൊണ്ട് ഈ വിജയത്തില്‍ ഒട്ടും അഹങ്കരിക്കരുതെന്നും കെ മുരളീധരന്‍ കൂട്ടിച്ചേര്‍ത്തു.
