മുംബൈ: ബോളിവുഡ് നടനും സഹസംവിധായകനുമായ സിദ്ധാന്ത് കപൂര്‍ മയക്കുമരുന്നുമായി പിടിയില്‍. ഇന്നലെ രാത്രി ബംഗളുരു എംജി റോഡിലെ ഹോട്ടലില്‍ നടന്ന റെയ്ഡില്‍ സിദ്ധാന്ത് കപൂറടക്കം ആറുപേരാണ് പിടിയിലായത്. ബോളിവുഡ് നടന്‍ ശക്തി കപൂറിന്റെ മകനും ശ്രദ്ധാ കപൂറിന്റെ സഹോദരനുമാണ് സിദ്ധാന്ത്. രഹസ്യവിവരത്തിന്റെ അടിസ്ഥാനത്തില്‍ ബംഗളുരുവിലെ ഹോട്ടലില്‍ നടത്തിയ റെയ്ഡില്‍ മയക്കുമരുന്ന് ഉപയോഗിച്ചവരെന്ന് സംശയിക്കുന്നവരുടെ സാമ്പിളുകള്‍ പൊലീസ് പരിശോധനയ്ക്കയച്ചിരുന്നു.
അങ്ങനെയാണ് സിദ്ധാന്തും മയക്കുമരുന്ന് ഉപയോഗിച്ചതായി കണ്ടെത്തിയത്. ഇവര്‍ മയക്കുമരുന്ന് കഴിച്ചശേഷമാണോ പാര്‍ട്ടിക്കുവന്നത് അതോ ഹോട്ടലില്‍വെച്ചാണോ മയക്കുമരുന്ന് കഴിച്ചത് എന്ന കാര്യം വ്യക്തമല്ലെന്ന് പൊലീസ് പറഞ്ഞു.
ജസ്ബ, ഹസീന പാര്‍ക്കര്‍, ചെഹ്‌ര, അഗ്ലി തുടങ്ങിയവയാണ് സിദ്ധാന്ത് കപൂര്‍ അഭിനയിച്ച ചിത്രങ്ങള്‍. ഭാഗം ഭാഗ്, ഭൂല്‍ ഭുലയ്യ, ചുപ് ചുപ് കേ തുടങ്ങിയ ചിത്രങ്ങളുടെ സഹസംവിധായകനായും സിദ്ധാന്ത് പ്രവര്‍ത്തിച്ചിട്ടുണ്ട്. നടന്‍ സുശാന്ത് സിംഗ് രജ്പുതിന്റെ മരണത്തിനുപിന്നാലെ നിരവധി ബോളിവുഡ് താരങ്ങളെ നര്‍ക്കോട്ടിക്‌സ് കണ്‍ട്രോള്‍ ബ്യൂറോ (എന്‍സിബി) ചോദ്യംചെയ്തിരുന്നു. സിദ്ധാന്തിന്റെ സഹോദരിയായ ശ്രദ്ധ കപൂര്‍, സാറാ അലി ഖാന്‍, ദീപികാ പദുക്കോണ്‍ തുടങ്ങിയവരെ ചോദ്യംചെയ്‌തെങ്കിലും എന്‍സിബിക്ക് മതിയായ തെളിവുകളൊന്നും ലഭിച്ചിരുന്നില്ല.
