ഡല്‍ഹി: പ്രവാചകന്‍ മുഹമ്മദ് നബിയെ അധിക്ഷേപിച്ച് സംസാരിച്ച സംഭവത്തില്‍ ബിജെപി മുന്‍ ദേശീയ വക്താവ് നൂപുര്‍ ശര്‍മ്മക്കെതിരെ വീണ്ടും കേസ്. ബംഗാളിലെ നര്‍ക്കല്‍ദംഗ പൊലീസാണ് നൂപുര്‍ ശര്‍മ്മക്ക് നോട്ടീസയച്ചത്. നൂപുറിനെതിരെ ബംഗാള്‍ പൊലീസെടുക്കുന്ന രണ്ടാമത്തെ കേസാണ് ഇത്. നേരത്തെ, ഈസ്റ്റ് മിഡ്‌നാപൂര്‍ പൊലീസും ഇവര്‍ക്കെതിരെ കേസെടുത്തിരുന്നു. പ്രവാചകനെ അധിക്ഷേപിച്ചുളള പരാമര്‍ശത്തിനുപിന്നാലെ നുപൂര്‍ ശര്‍മ്മക്കും നവീന്‍ ജിന്‍ഡാലിനുമെതിരെ മൂന്ന് സംസ്ഥാനങ്ങളില്‍കൂടി പുതുതായി കേസുകള്‍ രജിസ്റ്റര്‍ ചെയ്തിട്ടുണ്ട്. മഹാരാഷ്ട്ര, പശ്ചിമബംഗാള്‍, ജമ്മു കാശ്മീര്‍ എന്നീ സംസ്ഥാനങ്ങളിലാണ് ബിജെപി നേതാക്കള്‍ക്കെതിരെ കേസെടുത്തിരിക്കുന്നത്.
ചാനല്‍ ചര്‍ച്ചക്കിടെ പ്രവാചകനെ അധിക്ഷേപിച്ച് സംസാരിച്ചു എന്ന് ചൂണ്ടിക്കാട്ടി റാസ അക്കാദമിയുടെ മുംബൈ വിഭാഗം ജോയിന്റ് സെക്രട്ടറി ഇര്‍ഫാന്‍ ഷെയ്കക്കാണ് നൂപുര്‍ ശര്‍മ്മക്കെതിരെ ആദ്യം പരാതി നല്‍കിയത്. മതവികാരം വളര്‍ത്തുക, ശത്രുത വളര്‍ത്തുക, പൊതുശല്യം എന്നീ കുറ്റങ്ങള്‍ ചുമത്തിയാണ് നൂപുര്‍ ശര്‍മ്മക്കെതിരായ എഫ് ഐ ആര്‍ രജിസ്റ്റര്‍ ചെയ്തത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ദേശീയ ചാനലായ ടൈംസ് നൗവില്‍ ഗ്യാന്‍വാപി മസ്ജിദുമായി ബന്ധപ്പെട്ട് നടന്ന സംവാദത്തിലായിരുന്നു നൂപുര്‍ ശര്‍മ്മയുടെ വിവാദ പരാമര്‍ശം. നൂപുര്‍ ശര്‍മ്മ ചര്‍ച്ചക്കിടെ പ്രവാചകന്‍ മുഹമ്മദിനെയും അദ്ദേഹത്തിന്റെ ഭാര്യയെയും കുറിച്ച് മോശം പരാമര്‍ശം നടത്തുകയായിരുന്നു. ഇതിന്റെ വീഡിയോ സഹിതമാണ് ഇര്‍ഫാന്‍ ഷെയ്ക്ക് പരാതി നല്‍കിയത്.
