തിരുവനന്തപുരം: അഗ്നിപഥ് പദ്ധതിക്കെതിരെ രാജ്യത്തെ വിവിധ ഉദ്യോഗാര്ത്ഥികളുടെ സംഘടനകള് ആഹ്വാനം ചെയ്ത ഭാരത് ബന്ദ് കേരളത്തിലും ശക്തമാക്കാന് സമൂഹമാധ്യമങ്ങളിലൂടെ പ്രചരണം നടന്ന സാഹചര്യത്തില് അക്രമമുണ്ടായാല് നടപടിയെടുക്കുമെന്ന് സംസ്ഥാന പൊലീസ് മേധാവി. പൊലീസ് കൂടുതല് മുന്കരുതലുകള് സ്വീകരിക്കണമെന്ന് ഡി ജി പി അനില്കാന്ത് പറഞ്ഞു. അക്രമങ്ങളില് ഏര്പ്പെടുന്നവരെ ഉടനടി അറസ്റ്റ് ചെയ്യണം. കോടതികള്, വൈദ്യുതിബോര്ഡ് ഓഫീസുകള്, കെ എസ് ആര് ടി സി, മറ്റ് സര്ക്കാര് ഓഫീസുകള് തുടങ്ങിയവയ്ക്ക് പൊലീസ് സംരക്ഷണം നല്കണം, സര്വ്വീസ് നടത്തുന്ന സ്വകാര്യ ബസുകളുടെ സുരക്ഷ ഉറപ്പാക്കണം തുടങ്ങിയ നിര്ദേശങ്ങളാണ് ഡി ജി പി പൊലീസുകാര്ക്ക് നല്കിയത്. ഉത്തരേന്ത്യയില്പോലും ഭാരത് ബന്ദുമായി ബന്ധപ്പെട്ട് ഔദ്യോഗിക പ്രഖ്യാപനമില്ലെങ്കിലും ഇന്റലിജന്സ് വിവരത്തിന്റെ അടിസ്ഥാനത്തിലാണ് ജാഗ്രതാ നിര്ദേശം നല്കിയിരിക്കുന്നത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
പൊതുജനങ്ങള്ക്കെതിരെയുളള അക്രമങ്ങളും പൊതുസ്വത്ത് നശിപ്പിക്കുന്നതും കര്ശനമായി നേരിടും. അക്രമങ്ങള്ക്ക് മുതിരുന്നവരെയും വ്യാപാര സ്ഥാപനങ്ങള് നിര്ബന്ധപൂര്വ്വം അടപ്പിക്കുന്നവരെയും അറസ്റ്റ് ചെയ്ത് നിയമനടപടികളെടുക്കും. ജില്ലാ പൊലീസ് മേധാവിമാരുടെ നേതൃത്വത്തില് റെയ്ഞ്ച് ഡി ഐ ജിമാരും മേഖലാ ഐജിമാരും സുരക്ഷാക്രമീകരണങ്ങള് ഏകോപിപ്പിക്കും. സംസ്ഥാനത്തെ മുഴുവന് പൊലീസ് സേനയും തിങ്കളാഴ്ച്ച (ഇന്ന്) മുഴുവന് സമയവും സേവനസന്നദ്ധരായിരിക്കും തുടങ്ങിയ കാര്യങ്ങളാണ് ഡി ജി പി അനില്കാന്ത് പുറത്തിറക്കിയ മാര്ഗനിര്ദേശങ്ങളില് പറയുന്നത്.