പാലക്കാട്: യൂത്ത് കോണ്‍ഗ്രസ് സംസ്ഥാന ക്യാംപില്‍ നിലവിലെ നേതൃത്വത്തിനെതിരെ വിമര്‍ശനം. യൂത്ത് കോണ്‍ഗ്രസ് സംസ്ഥാന അധ്യക്ഷന്‍ ഷാഫി പറമ്പിലുള്‍പ്പെടെയുളള നേതാക്കള്‍ ഷോ കാണിക്കുകയാണെന്നും കാണുന്ന ആളുകള്‍ക്കൊപ്പം സെല്‍ഫി എടുത്തതുകൊണ്ടുമാത്രം സംഘടന വളരില്ലെന്നും പ്രതിനിധികള്‍ കുറ്റപ്പെടുത്തി. പാലക്കാട് വാളയാറിലാണ് യൂത്ത് കോണ്‍ഗ്രസിന്റെ സംസ്ഥാന ക്യാംപ് നടന്നുകൊണ്ടിരിക്കുന്നത്. സംഘടനാ പ്രമേയത്തിന്മേലുളള ചര്‍ച്ചയിലാണ് വിമര്‍ശനമുയര്‍ന്നത്.
ക്യാംപില്‍ ഏറ്റവും കൂടുതല്‍ വിമര്‍ശനങ്ങളുണ്ടായത് സംസ്ഥാന അധ്യക്ഷന്‍ ഷാഫി പറമ്പിലിനെതിരെയാണ്. ഷാഫിയുടെ പ്രവര്‍ത്തനങ്ങള്‍ പലപ്പോഴും ഷോ മാത്രമായി മാറുന്നു എന്നാണ് വിമര്‍ശനം. പണിയെടുക്കാന്‍ ഒരുവിഭാഗം ആളുകളും നേതാവാകാന്‍ മറ്റൊരു വിഭാഗവും എന്ന സാഹചര്യമാണ് നിലനില്‍ക്കുന്നത്. ഇതിന് മാറ്റമുണ്ടാകണം. യൂത്ത് കോണ്‍ഗ്രസ് നേതാക്കള്‍ കോണ്‍ഗ്രസ് നേതാക്കളെപ്പോലെ ഗ്രൂപ്പിസത്തിന്റെ വക്താക്കളാവുന്നു. ഗ്രൂപ്പ് കളിച്ചുനടന്നാല്‍ ഇനിയും കോണ്‍ഗ്രസ് പ്രതിപക്ഷത്തുതന്നെ തുടരും എന്നാണ് വിമര്‍ശനം. ഷാഫി പറമ്പിലിന്റെ സാന്നിദ്ധ്യത്തില്‍തന്നെയായിരുന്നു പ്രതിനിധികളുടെ വിമര്‍ശനം.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ജൂലൈ രണ്ടിനാണ് യൂത്ത് കോണ്‍ഗ്രസ് സംസ്ഥാന ക്യാംപിന് തുടക്കമായത്. യൂത്ത് കോണ്‍ഗ്രസ് ദേശീയ അധ്യക്ഷന്‍ ബി വി ശ്രീനിവാസ് ഉള്‍പ്പെടെയുളളവര്‍ ക്യാംപില്‍ പങ്കെടുത്തിരുന്നു. ഇന്ന് കെ പി സി സി പ്രസിഡന്റ് കെ സുധാകരനും ക്യാംപില്‍ പങ്കെടുക്കും. ഇന്നുവൈകുന്നേരത്തോടെ യൂത്ത് കോണ്‍ഗ്രസ് സംസ്ഥാന ക്യാംപ് സമാപിക്കും.
