തിരുവനന്തപുരം: കേന്ദ്രമന്ത്രിമാരെ പരിഹസിച്ച് പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ്. പൂര്ത്തിയാകാറായ പദ്ധതികള്ക്കുമുന്നില്വന്ന് ഫോട്ടോ എടുത്തുപോകുന്ന കേന്ദ്രമന്ത്രിമാര് ദേശീയ പാതകളിലെ കുഴികള്കൂടി എണ്ണണം എന്ന് മുഹമ്മദ് റിയാസ് പറഞ്ഞു. ദേശീയ പാതകളിലെ കുഴികളെക്കുറിപ്പ് പലതവണ പരാതി പറഞ്ഞിട്ടും പരിഹാരമുണ്ടായില്ലെന്നും അദ്ദേഹം ആരോപിച്ചു. നിയമസഭയിലായിരുന്നു കേന്ദ്രമന്ത്രിമാര്ക്കെതിരായ മന്ത്രിയുടെ വിമര്ശനം.
'കേരളത്തില് ജനിച്ച്, ഇവിടെ കളിച്ചുവളര്ന്ന് മറ്റൊരു സംസ്ഥാനത്തുനിന്ന് രാജ്യസഭാംഗമായി ഇപ്പോള് കേന്ദ്രമന്ത്രി വരെയായ ഒരു വ്യക്തിയുണ്ട്. അദ്ദേഹം എല്ലാ ദിവസവും പത്രസമ്മേളനം നടത്തുന്നുമുണ്ട്. അത് നല്ല കാര്യം തന്നെയാണ്. അദ്ദേഹം നടത്തുന്ന പത്രസമ്മേളനങ്ങളേക്കാള് കൂടുതല് കുഴികള് ദേശീയ പാതയിലുണ്ട്. അത് ഒരു വസ്തുതയാണ്. ഈ വിഷയം ശ്രദ്ധയില്പ്പെടുത്തിയിട്ടും ഒരു നടപടിയുമുണ്ടായില്ല. ഇപ്പോള് കേരളത്തിലേക്ക് ഒരുപാട് കേന്ദ്രമന്ത്രിമാര് വരുന്നുണ്ട്. അവര് ദേശീയപാത അതോറിറ്റിയുടെ കീഴിലുളള റോഡുകളിലെ കുഴികളുടെ എണ്ണമെടുക്കാനും കുഴികളടയ്ക്കാനും കൂടി ശ്രമിക്കുന്നത് നന്നാവും'- മന്ത്രി റിയാസ് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
അതേസമയം, ദേശീയപാതാ വികസനം നടക്കുന്നുണ്ടെന്നത് ഒരു യാഥാര്ത്ഥ്യമാണെന്നും ദേശീയപാതാ വികസനത്തിന് പ്രതിപക്ഷം സഹകരിക്കുമ്പോള് മന്ത്രി പ്രകോപനം സൃഷ്ടിക്കുന്നത് ശരിയല്ലെന്നും പ്രതിപക്ഷ നേതാവ് വി ഡി സതീശന് പറഞ്ഞു. അതിന്, താന് കേന്ദ്രത്തെ വിമര്ശിക്കുമ്പോള് സഭയില് ബിജെപി പ്രതിനിധിയുണ്ടായിരുന്നെങ്കില് പ്രകോപിതനായേനേ അവരില്ലാത്തപ്പോള് മറ്റുളളവര്ക്ക് എങ്ങനെ പ്രകോപനമുണ്ടായി, അങ്ങനെ പ്രകോപനമുണ്ടായെങ്കില് തനിക്കൊന്നും ചെയ്യാന് പറ്റില്ല എന്നായിരുന്നു മന്ത്രി റിയാസിന്റെ മറുപടി.