നടന് മമ്മൂട്ടിയുടെ നേതൃത്വത്തില് പ്രവര്ത്തിക്കുന്ന കെയര് ആന്ഡ് ഷെയര് ഇന്റര്നാഷല് ഫൗണ്ടേഷന് കൊവിഡും മറ്റ് പ്രകൃതിദുരന്തങ്ങളും മൂലം അനാഥരായ വിദ്യാര്ത്ഥികള്ക്ക് പഠന സഹായം നല്കുന്നു. കെയര് ആന്ഡ് ഷെയര് ഇന്റര്നാഷണല് ഫൗണ്ടേഷനും എംജിഎം ഗ്രൂപ്പും ചേര്ന്ന് വിദ്യാമൃതം 2 പദ്ധതിക്ക് തുടക്കംകുറിക്കുകയാണെന്ന് മമ്മൂട്ടി ഫേസ്ബുക്കിലൂടെയാണ് അറിയിച്ചത്. കൊവിഡ് മഹാമാരി മൂലം മാതാപിതാക്കള് നഷ്ടപ്പെട്ട 100 കുട്ടികളുടെ വിദ്യാഭ്യാസം ഏറ്റെടുക്കുന്നതാണ് പദ്ധതി. പദ്ധതി പ്രകാരം ഏറ്റെടുക്കുന്ന കുട്ടികളുടെ കോളേജ് വിദ്യാഭ്യാസം പൂര്ണമായും സൗജന്യമായിരിക്കും. എഞ്ചിനീയറിംഗിന്റെ വിവിധ ശാഖകള്, പോളിടെക്നിക് കോഴ്സുകള്, ആര്ട്സ് കോഴ്സുകള്, കൊമേഴ്സ് തുടങ്ങിയ വിഷയങ്ങള് സൗജന്യവിദ്യാഭ്യാസ പദ്ധതിയില് ഉള്പ്പെടും.
മമ്മൂട്ടിയുടെ കുറിപ്പ്
കോവിഡ് മഹാമാരിയും പ്രകൃതിദുരന്തങ്ങളും ഒരുപാട് അനാഥരെ സൃഷ്ടിച്ചിട്ടുണ്ട്. അവരിൽ ഉപരിപഠനം പ്രതിസന്ധിയിലായ വിദ്യാർഥികൾക്ക് സഹായം നൽകുക എന്ന ലക്ഷ്യത്തോടെ, ഞാൻ കൂടി ഭാഗമായ കെയർ ആൻ്റ് ഷെയർ ഇൻ്റർനാഷണൽ ഫൗണ്ടേഷൻ പ്രമുഖ വിദ്യാഭ്യാസ ഗ്രൂപ്പായ എം.ജി.എം ഗ്രൂപ്പിനൊപ്പം ചേർന്ന് 'വിദ്യാമൃതം - 2' പദ്ധതിക്ക് തുടക്കം കുറിക്കുകയാണ്.
പ്ലസ് ടു ജയിച്ച നൂറു വിദ്യാർഥികൾക്ക് എന്ജിനീയറിങ്ങ്,പോളിടെക്നിക്ക്,ആര്ട്സ് ആന്റ് സയന്സ്,കൊമേഴ്സ്,ഫാര്മസി ശാഖകളിലെ ഒരുഡസനോളം കോഴ്സുകളിലാണ് തുടർ പഠനസൗകര്യമൊരുക്കുന്നത്. കോവിഡിലും പ്രകൃതിക്ഷോഭത്തിലും മാതാപിതാക്കളെ നഷ്ടപ്പെട്ട കുട്ടികൾക്കൊപ്പം സാമ്പത്തികമായി പിന്നോക്കം നിൽക്കുന്ന വിദ്യാർഥികളെയും പദ്ധതിയുടെ പരിധിയിൽ കൊണ്ടുവരാൻ ഉദ്ദേശ്യമുണ്ട്. അർഹരായ വിദ്യാർഥികളെ യോഗ്യതയുടെ അടിസ്ഥാനത്തിലാകും ഇതിൽ ഉൾപ്പെടുത്തുക.
വിശദ വിവരങ്ങൾക്ക് 7025335111, 9946485111 എന്നീ നമ്പരുകളിൽ ബന്ധപ്പെടാം.