തിരുവനന്തപുരം: സംസ്ഥാനത്തെ റോഡുകളിലെ കുഴികള്‍ അടയ്ക്കുന്നതുമായി ബന്ധപ്പെട്ട് പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസിനെതിരെ വിമര്‍ശനവുമായി പ്രതിപക്ഷ നേതാവ് വി ഡി സതീശന്‍. റോഡുകളിലെ കുഴികളടയ്ക്കുന്നതിനെക്കുറിച്ചുളള ചോദ്യങ്ങള്‍ക്ക് മന്ത്രി മറുപടി നല്‍കുന്നില്ലെന്നും ഉത്തരം കിട്ടാതെ അദ്ദേഹം കൊഞ്ഞനംകുത്തുകയാണെന്നും വി ഡി സതീശന്‍ പറഞ്ഞു.
'കോടതി പോലും റോഡിലെ കുഴികള്‍ക്കെതിരെ പരാമര്‍ശം നടത്തി. എന്നാല്‍ പ്രതിപക്ഷം ഒന്നും പറയാന്‍ പാടില്ലെന്നത് മന്ത്രിയുടെ അസഹിഷ്ണുതയാണ്. പ്രീ മണ്‍സൂര്‍ വര്‍ക്കുകള്‍ ഇതുവരെ നടന്നിട്ടില്ല. ഇപ്പോഴും ടെന്‍ഡറുകള്‍ പുരോഗമിക്കുകയാണ്. റോഡിലെ കുഴികളെക്കുറിച്ച് ചോദിക്കുമ്പോള്‍ എന്റെ മനസിലെ കുഴികളടയ്ക്കാനാണ് മന്ത്രി പറയുന്നത്. എന്റെ മനസിലുളള കുഴികളില്‍ വീണ് ആരും മരിക്കില്ല. അരിയെത്ര എന്ന് ചോദിക്കുമ്പോള്‍ പയറഞ്ഞാഴി എന്നതാണ് മന്ത്രിയുടെ നിലപാട്. ചോദിച്ച ചോദ്യങ്ങള്‍ക്ക് ഉത്തരം നല്‍കാതെ മന്ത്രി വ്യക്തിഹത്യ നടത്തുകയായിരുന്നു. റോഡിലെ കുഴികള്‍ അടയ്ക്കുമോ എന്നാണ് ജനങ്ങള്‍ക്ക് അറിയേണ്ടത്'- വി ഡി സതീശന്‍ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
'ദേശീയപാതാ അതോറ്റിയേയും കേന്ദ്രത്തെയും വി ഡി സതീശന്‍ സഹായിക്കുകയാണ്. സതീശന്‍ കേന്ദ്രത്തിന്റെ വക്കാലത്ത് പിടിക്കുന്നു. പ്രതിപക്ഷ നേതാവ് സ്വയം വലിയ മഹാനാണ് എന്നാണ് കരുതുന്നത്. സാമൂഹ്യ പ്രവര്‍ത്തനത്തിന്റെ ഭാഗമായി ഒരു കൊതുകുകടി പോലും കൊളളാത്തയാളാണ് വി ഡി സതീശന്‍. അദ്ദേഹത്തിന്റെ സങ്കുചിത മനസിന്റെ കുഴി ആദ്യം അടയ്ക്കണം'-എന്നായിരുന്നു മുഹമ്മദ് റിയാസ് പറഞ്ഞത്.
