ന്യൂയോര്‍ക്ക്: ഇന്ത്യന്‍ സംഗീത ഇതിഹാസം എ ആര്‍ റഹ്‌മാന്റെ പേര് സ്ട്രീറ്റിനിട്ട് കാനഡയിലെ ഒരു നഗരം. ദക്ഷിണ കാനഡയിലെ ഒന്റാരിയോ പ്രവിശ്യയിലുളള മാര്‍ഖാം നഗരത്തിലെ ഒരു സ്ട്രീറ്റിനാണ് എ ആര്‍ റഹ്‌മാന്റെ പേരിട്ടിരിക്കുന്നത്. മേയറും നഗരസഭാ നേതാക്കളും മറ്റ് പ്രമുഖ വ്യക്തികളും പങ്കെടുത്ത ചടങ്ങിന്റെ ഭാഗമാവാന്‍ എ ആര്‍ റഹ്‌മാനും എത്തിയിരുന്നു. പരിപാടിയുടെ ചിത്രങ്ങള്‍ റഹ്മാന് ട്വിറ്ററില്‍ പങ്കുവെച്ചിട്ടുണ്ട്. നേരത്തെ എ ആര്‍ റഹ്മാന് കാനഡ പൗരത്വം വാഗ്ദാനം ചെയ്തിരുന്നു.
'ജീവിതത്തില്‍ ഒരിക്കല്‍പോലും ചിന്തിച്ചിട്ടില്ലാത്ത കാര്യമാണിത്. ഇതിന് എല്ലാവരോടും കടപ്പെട്ടിരിക്കുന്നു. കാനഡയിലെ മാര്‍ഖാം മേയര്‍ ഫ്രാങ്ക് സ്‌കാര്‍പിറ്റി, കൗണ്‍സിലര്‍മാര്‍, ഇന്ത്യന്‍ കോണ്‍സുല്‍ ജനറല്‍ അപൂര്‍വ്വ ശ്രീവാസ്തവ, കനേഡിയന്‍ ജനത... എല്ലാവര്‍ക്കും നന്ദി. എ ആര്‍ റഹ്മാന് എന്ന പേര് എന്റേതല്ല. കരുണാമയന്‍ എന്നാണ് പേരിന്റെ അര്‍ത്ഥം. ആ കാരുണ്യവാന്റെ സേവകരാവാനേ എല്ലാവര്‍ക്കും പറ്റൂ. അതിനാല്‍ ആ പേര് കനേഡിയന്‍ ജനതയ്ക്ക് സന്തോഷവും സമാധാനവും സമൃദ്ധിയുമെല്ലാം നല്‍കട്ടെ. ദൈവം എല്ലാവരെയും അനുഗ്രഹിക്കട്ടെ'-എ ആര്‍ റഹ്മാന് വാര്‍ത്താക്കുറിപ്പില്‍ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
'ഈ സ്‌നേഹത്തിന് എല്ലാ സഹോദരീ-സഹോദരന്മാരോടും നന്ദി പറയുകയാണെന്നും പിന്‍വലിയാതെ, തളര്‍ന്നുപോകാതെ, കൂടുതല്‍ കാര്യങ്ങള്‍ ചെയ്യാനും പ്രചോദനമാകാനുമുളള ഉത്തരവാദിത്തമാണ് തനിക്കിത് നല്‍കുന്നതെന്നും അദ്ദേഹം പറഞ്ഞു. ഇന്ത്യന്‍ വംശജരും കനേഡിയന്‍ പൗരന്മാരുമടക്കം നൂറുകണക്കിന് ആളുകളാണ് പരിപാടിക്കെത്തിയത്.
