ഹൈദരാബാദ്: അഹമ്മദാബാദിലെ എല്‍ ജി മെഡിക്കല്‍ കോളേജിന്റെ പേര് നരേന്ദ്രമോദി മെഡിക്കല്‍ കോളേജ് എന്ന് പുനര്‍നാമകരണം ചെയ്തതിനുപിന്നാലെ പ്രധാനമന്ത്രിക്കും ധനമന്ത്രി നിര്‍മ്മലാ സീതാരാമനുമെതിരെ പരിഹാസവുമായി തെലങ്കാന രാഷ്ട്രസമിതി (ടി ആര്‍ എസ്) വര്‍ക്കിംഗ് പ്രസിഡന്റും വ്യവസായ മന്ത്രിയുമായ കെ ടി രാമറാവു. നിര്‍മ്മലാ സീതാരാമന് എന്തെങ്കിലും ഒരു വഴിയുണ്ടെങ്കില്‍ മഹാത്മാഗാന്ധിക്കുപകരം നരേന്ദ്രമോദിയുടെ ചിത്രം പതിച്ച പുതിയ കറന്‍സികള്‍ അച്ചടിക്കാന്‍ റിസര്‍വ്വ് ബാങ്ക് ഓഫ് ഇന്ത്യയോട് ആവശ്യപ്പെടുമായിരുന്നു എന്നാണ് കെ ടി രാമറാവുവിന്റെ പരിഹാസം.
'അഹമ്മദാബാദിലെ എല്‍ ജി മെഡിക്കല്‍ കോളേജിന്റെ പേര് ഇനിമുതല്‍ നരേന്ദ്രമോദി മെഡിക്കല്‍ കോളേജ് !സര്‍ദാര്‍ പട്ടേല്‍ സ്റ്റേഡിയം നേരത്തെ തന്നെ നരേന്ദ്രമോദി സ്റ്റേഡിയം എന്ന് പുനര്‍നാമകരണം ചെയ്തിട്ടുണ്ട്. ധനമന്ത്രി നിര്‍മ്മലാ സീതാരാമന് എന്തെങ്കിലും ഒരു വഴിയുണ്ടായിരുന്നെങ്കില്‍ മഹാത്മാഗാന്ധിക്കുപകരം, മോദിയുടെ ചിത്രം വരുന്ന പുതിയ കറന്‍സി നോട്ടുകള്‍ അച്ചടിക്കാന്‍ ആര്‍ ബി ഐക്ക് ഉത്തരവിട്ടേക്കും'- കെ ടി രാമറാവു പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
നേരത്തെ, തെലങ്കാനയില്‍ ബിജെപി അധികാരത്തിലെത്തിയാല്‍ ഹൈദരാബാദിന്റെ പേര് ഭാഗ്യനഗര്‍ എന്നാക്കുമെന്ന് ജാര്‍ഖണ്ഡ് മുന്‍ മുഖ്യമന്ത്രി രഘുബര്‍ ദാസ് പറഞ്ഞിരുന്നു. അതിന് അഹമ്മദാബാദിന്റെ പേര് അദാനിബാദ് എന്നാക്കി മാറ്റാത്തത് എന്തുകൊണ്ടാണ് എന്നായിരുന്നു കെ ടി രാമറാവുവിന്റെ പ്രതികരണം. പ്രധാനമന്ത്രി നരേന്ദ്രമോദിയുടെ ജന്മദിനാഘോഷങ്ങളുടെ ഭാഗമായാണ് മെഡിക്കല്‍ കോളേജിന്റെ പേര് മാറ്റുന്നത്.
