തിരുവനന്തപുരം: സംസ്ഥാന കോണ്ഗ്രസിലെ ഏറ്റവും മുതിര്ന്ന നേതാക്കളില് ഒരാളും മുന് വൈദ്യുതി മന്ത്രിയുമായ ആര്യാടന് മുഹമ്മദിന്റെ നിര്യാണത്തില് അനുശോചനം രേഖപ്പെടുത്തി കേരളത്തിലെ രാഷ്ട്രീയ നേതാക്കള്. ഇടതുപക്ഷവുമായി യോജിച്ചും വിയോജിച്ചും പ്രവര്ത്തിച്ചയാളാണ് ആര്യാടന് മുഹമ്മദെന്നും ശ്രദ്ധേയനായ നിയമസഭാ സാമാജികനായിരുന്നു അദ്ദേഹമെന്നും മുഖ്യമന്ത്രി പിണറായി വിജയന് പറഞ്ഞു. മതനിരപേക്ഷ നിലപാടുകള് ഉയര്ത്തിപ്പിടിച്ച അദ്ദേഹത്തിന് ശക്തമായ വാദമുഖങ്ങള് നിയമസഭയില് ഉന്നയിക്കാന് കഴിഞ്ഞിരുന്നുവെന്നും മുഖ്യമന്ത്രി കൂട്ടിച്ചേര്ത്തു.
അതേസമയം, കോണ്ഗ്രസിന്റെ മലബാറിലെ അതികായനും കറകളഞ്ഞ മതേതരവാദിയുമായിരുന്നു ആര്യാടന് മുഹമ്മദെന്ന് മുതിര്ന്ന കോണ്ഗ്രസ് നേതാവും മുന് മുഖ്യമന്ത്രിയുമായ ഉമ്മന്ചാണ്ടി പറഞ്ഞു. മികച്ച ഭരണാധികാരി, രാഷ്ട്രീയതന്ത്രഞ്ജന്, ട്രേഡ് യൂണിയന് നേതാവ് തുടങ്ങിയ നിലകളിലെല്ലാം പ്രതിഭ തെളിയിച്ച നേതാവാണ് അദ്ദേഹം. ശക്തമായ നിലപാടുകള്കൊണ്ട് അദ്ദേഹം സ്വയം അടയാളപ്പെടുത്തി. 2004-ലെ യുഡിഎഫ് മന്ത്രിസഭയില് വൈദ്യുതിമന്ത്രിയായിരിക്കെ മലയോരങ്ങളിലും ആദിവാസി കോളനികളിലുമൊക്കെ വൈദ്യുതി എത്തിച്ച അദ്ദേഹത്തിന്റെ പ്രവര്ത്തനം ശ്രദ്ധേയമായിരുന്നു. മലബാറിലെ വോള്ട്ടേജ് ക്ഷാമം പരിഹരിക്കുന്നതിനും മുന്കൈ എടുത്തു. ജനങ്ങളുമായി അടുത്ത ബന്ധം നിലനിര്ത്തിയാണ് അദ്ദേഹം 8 തവണ നിലമ്പൂരില് നിന്ന് നിയമസഭയിലേക്ക് തെരഞ്ഞെടുക്കപ്പെട്ടത്. കോണ്ഗ്രസിനും മതേതര കേരളത്തിനും കനത്ത നഷ്ടമാണ് അദ്ദേഹത്തിന്റെ വിയോഗമെന്നും ഉമ്മന് ചാണ്ടി അനുസ്മരിച്ചു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഇന്ന് പുലര്ച്ചെ രണ്ടു മണിയോടെ കോഴിക്കോട് നഗരത്തിലെ സ്വകാര്യ ആശുപത്രിയില് വെച്ചാണ് ആര്യാടന് മുഹമ്മദ് അന്തരിച്ചത്. 87 വയസായിരുന്നു. വാര്ധക്യ സഹജമായ അസുഖങ്ങള് അലട്ടിയിരുന്നു. ഒരാഴ്ച മുന്പാണ് ആശുപത്രിയില് പ്രവേശിപ്പിച്ചത്. മലബാറില് കോണ്ഗ്രസിന്റെ ഏറെക്കാലത്തെ ശക്തനായ നേതാവായിരുന്നു ആര്യാടന്. എ ഗ്രൂപ്പിന്റെ കരുത്തുറ്റ മുഖവുമായിരുന്നു അദ്ദേഹം. എട്ടു തവണ സ്വന്തം മണ്ഡലമായ നിലമ്പൂരിനെ പ്രതിനിധീകരിച്ച് നിയമസഭയിലെത്തി. വിവിധ സര്ക്കാരുകളില് വൈദ്യുതി, വനം, ഗതാഗത മന്ത്രിയുമായിരുന്നു. 1977, 1980, 1987, 1991, 1996, 2001, 2006, 2011 എന്നീ വര്ഷങ്ങളിലാണ് നിലമ്പൂര് നിയമസഭാ മണ്ഡലത്തില്നിന്ന് കേരള നിയമസഭയിലെത്തിയത്.