തിരുവനന്തപുരം: പോപ്പുലര്‍ ഫ്രണ്ട് നിരോധിച്ചത് നല്ല കാര്യമാണെന്നും അതുപോലെ ആര്‍ എസ് എസിനെയും നിരോധിക്കണമെന്നും മുന്‍ പ്രതിപക്ഷ നേതാവ് രമേശ്‌ ചെന്നിത്തല. സമൂഹത്തില്‍ വര്‍ഗീയത ആളിക്കത്തിക്കുന്ന കാര്യത്തില്‍ രണ്ടുകൂട്ടര്‍ക്കും ഒരേ നിലപാടാണെന്നും രമേശ്‌ ചെന്നിത്തല കൂട്ടിച്ചേര്‍ത്തു. നൂനപക്ഷ വര്‍ഗീയതയ്ക്ക് വളം വെക്കുന്നത് ആര്‍ എസ് എസാണെന്നും അദ്ദേഹം ആരോപിച്ചു.
ആര്‍ എസ് എസിന്‍റെയും പി എഫ് ഐയുടെയും നിലപാട് തെറ്റാണ്. കോണ്‍ഗ്രസ് എന്നും ഭൂരിപക്ഷ വര്‍ഗീയതയ്ക്കും നൂനപക്ഷ വര്‍ഗീയതയ്‌ ക്കും എതിരാണ്. വര്‍ഗീയ തീവ്രവാദം ആളിക്കത്തിച്ച് ജനങ്ങളെ തെറ്റിദ്ധരിപ്പിക്കാനും അതുവഴി അധികാരം പിടിച്ചെടുക്കാനുമുള്ള എല്ലാ ശ്രമങ്ങളെയും കോണ്‍ഗ്രസ് എതിര്‍ക്കുമെന്നും രമേശ്‌ ചെന്നിത്തല പറഞ്ഞു. ഒരു പ്രസ്ഥാനത്തെ നിരോധിക്കുന്നത് കാര്യമില്ല. അത് മറ്റൊരു പേരില്‍ ഉയര്‍ന്നുവരും. പോപ്പുലര്‍ ഫ്രണ്ട് നടത്തിയ ഹര്‍ത്താല്‍ സംസ്ഥാന സര്‍ക്കാര്‍ കൈകാര്യം ചെയ്ത രീതി ജനങ്ങള്‍ ചര്‍ച്ച ചെയ്യുന്നുണ്ടെന്നും രമേശ്‌ ചെന്നിത്തല കുറ്റപ്പെടുത്തി.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
കഴിഞ്ഞ ദിവസങ്ങളില്‍ എന്‍ ഐ എ പോപ്പുലര്‍ ഫ്രണ്ട് നേതാക്കളുടെ വീടുകളിലും ഓഫീസുകളിലും റെയ്ഡ് നടത്തിയിരുന്നു. രാജ്യവ്യാപമായി നടത്തിയ പരിശോധനയില്‍ നിരവധിയാളുകളെ എന്‍ ഐ എ അറസ്റ്റ് ചെയ്യുകയും ചെയ്തു. ഇതിനു പിന്നാലെയാണ് പോപ്പുലര്‍ ഫ്രണ്ടിനെ കേന്ദ്രസര്‍ക്കാര്‍ നിരോധിച്ചത്. അഞ്ചുവര്‍ഷത്തേക്കാണ് നിരോധനം. രാജ്യസുരക്ഷയ്ക്കും ക്രമസമാധാനത്തിനും ഭീഷണിയാണെന്ന് ചൂണ്ടിക്കാട്ടിയാണ് കേന്ദ്ര ആഭ്യന്തര മന്ത്രാലയത്തിന്റെ നടപടി. പോപ്പുലര്‍ ഫ്രണ്ടിനെ കൂടാതെ, റിഹാബ് ഇന്ത്യ ഫൗണ്ടേഷന്‍, കാമ്പസ് ഫ്രണ്ട് ഓഫ് ഇന്ത്യ, എന്‍ സി എച്ച് ആര്‍ ഒ, നാഷണല്‍ വുമണ്‍സ് ഫ്രണ്ട്, ജൂനിയര്‍ ഫ്രണ്ട്, ആള്‍ ഇന്ത്യ ഇമാംസ് കൗണ്‍സില്‍, എംപവര്‍ ഇന്ത്യ ഫൗണ്ടേഷന്‍ എന്നീ സംഘടനകളെയും നിരോധിച്ചിട്ടുണ്ട്.
