ലണ്ടന്‍: ഹോളിവുഡില്‍ നിലനില്‍ക്കുന്ന വംശീയ വിവേചനം ചൂണ്ടിക്കാട്ടി ആക്ടിവിസ്റ്റും നൊബേല്‍ സമ്മാന ജേതാവുമായ മലാല യൂസുഫ്‌സായ്. ജനപ്രിയ ടെലിവിഷന്‍ പരമ്പരകളില്‍ മുസ്ലീം അഭിനേതാക്കളുടെ എണ്ണം ഒരു ശതമാനം മാത്രമാണെന്നും ഹോളിവുഡ് സിനിമകളില്‍ ഏഷ്യന്‍ വംശജര്‍ വെറും നാലുശതമാനം മാത്രമാണെന്നും മലാല പറഞ്ഞു. അമേരിക്കന്‍ ചാനലായ ലൈഫ് ടൈമിന്റെ 'വെറൈറ്റീസ് പവര്‍ ഓഫ് വിമെന്‍' എന്ന പരിപാടിയില്‍ സംസാരിക്കുകയായിരുന്നു അവര്‍.
'ഹോളിവുഡ് സിനിമകളിലെ നായകന്മാരായുളള ഏഷ്യന്‍ വംശജര്‍ നാലുശതമാനത്തിനും താഴെയാണ് എന്നാണ് ഞാന്‍ മനസിലാക്കിയത്. ജനസംഖ്യയുടെ 25 ശതമാനം മുസ്ലീങ്ങളാണ്. പക്ഷേ ജനപ്രിയ ടി വി സീരീയലുകളിലെ കഥാപാത്രങ്ങളുടെ ഒരു ശതമാനം മാത്രമാണ് മുസ്ലീങ്ങള്‍'- മലാല പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
അതേസമയം, ചലച്ചിത്ര- ടെലിവിഷന്‍ മേഖലയില്‍ സ്വന്തം പ്രൊഡക്ഷന്‍ ഹൗസുമായി അരങ്ങേറ്റം കുറിക്കാനിരിക്കുകയാണ് മലാല. എക്ട്രാകരിക്കുലര്‍ എന്നാണ് മലാലയുടെ പ്രൊഡക്ഷന്‍ ഹൗസിന്റെ പേര്. ഏഷ്യന്‍ വംശജരായ മുസ്ലീങ്ങളെയും വനിതകളെയും മുഖ്യധാരയിലെത്തിക്കുക എന്ന ലക്ഷ്യത്തോടെയാണ് പ്രൊഡക്ഷന്‍ ഹൗസ് ആരംഭിക്കുന്നതെന്നും വ്യത്യസ്തമായ കാഴ്ച്ചപ്പാടുകള്‍ അവതരിപ്പിക്കാനും സമൂഹത്തില്‍ നിലനില്‍ക്കുന്ന മോശം പ്രവണതകളെ ഇല്ലാതാക്കാനും അതുവഴി കഴിയുമെന്നും മലാല പറഞ്ഞു.
