രാജ്യത്ത് ദാരിദ്രവും തൊഴിലില്ലായ്മയും സാമ്പത്തിക അസമത്വവും രൂക്ഷമാണെന്ന് ആര്‍ എസ് എസ് ജനറല്‍ സെക്രട്ടറി ദത്താത്തേയ ഹൊസബല. ഇരുപതുകോടിയിലേറേ ജനങ്ങള്‍ ഇപ്പോഴും ദാരിദ്രരേഖയ്ക്ക് താഴെയാണെന്ന കാര്യം ഏറെ ദുഖിപ്പിക്കുന്നുണ്ടെന്നും ദാരിദ്ര നിര്‍മ്മാര്‍ജ്ജനം വളരെ പ്രധാനമാണെന്നും ദത്താത്തേയ ഹൊസബല പറഞ്ഞു. സ്വദേശി ജാഗരണ്‍ മഞ്ച് സംഘടിപ്പിച്ച വെബിനാറില്‍ പങ്കെടുത്ത് സംസാരിക്കുകയായിരുന്നു അദ്ദേഹം.
'ദാരിദ്രം രാജ്യത്തിനുമുന്നില്‍ ഒരു പിശാചിനെപ്പോലെ വന്നുനില്‍ക്കുകയാണ്. ആ രാക്ഷസനെ നിഗ്രഹിക്കേണ്ടത് വളരെ പ്രധാനമാണ്. 20 കോടി ജനങ്ങള്‍ ഇപ്പോഴും ദാരിദ്രരേഖയ്ക്ക് താഴെയാണ് എന്നത് വളരെ ദുഖിപ്പിക്കുന്ന കാര്യമാണ്. 23 കോടി ജനങ്ങളുടെ പ്രതിദിന വരുമാനം 375 രൂപയില്‍ താഴെയാണ്. നാലുകോടിയിലേറേ തൊഴിലില്ലാത്തവരുണ്ട്. രാജ്യത്തെ തൊഴിലില്ലായ്മ നിരക്ക് 7.6 ശതമാനമാണെന്ന് ലേബര്‍ ഫോഴ്‌സ് സര്‍വ്വേ പറയുന്നു'-ദത്താത്തേയ ഹൊസബല പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
രാജ്യത്തെ മൊത്തം വരുമാനത്തിന്റെ അഞ്ചിലൊന്നും ഒരുശതമാനം വരുന്ന ആളുകളുടെ കയ്യിലാണെന്നും രാജ്യത്തിന്റെ പകുതി ജനങ്ങളുടെ കയ്യില്‍ ആകെ വരുമാനത്തിന്റെ പതിനൊന്ന് ശതമാനം മാത്രമേയുളളു എന്നും അദ്ദേഹം കൂട്ടിച്ചേര്‍ത്തു. കഴിഞ്ഞ ദിവസം കേന്ദ്രമന്ത്രി നിതില്‍ ഗഡ്കരിയും രാജ്യത്തെ തൊഴിലില്ലായ്മയെക്കുറിച്ചും ദാരിദ്രത്തെക്കുറിച്ചും സംസാരിച്ചിരുന്നു. കോണ്‍ഗ്രസടക്കമുളള പ്രതിപക്ഷ പാര്‍ട്ടികള്‍ കേന്ദ്രസര്‍ക്കാരിനെതിരെ ആയുധമാക്കുന്ന വിഷയങ്ങളാണ് തൊഴിലില്ലായ്മയും ദാരിദ്രവും വിലക്കയറ്റവും. അതിനിടെയാണ് ആര്‍ എസ് എസ് തലപ്പത്തുനിന്നുളള വിമര്‍ശനം.
