കൊച്ചി: ശരീരവണ്ണത്തിന്റെ പേരില്‍ സിനിമയില്‍നിന്ന് മാറ്റിനിര്‍ത്തപ്പെട്ടിട്ടുണ്ടെന്ന് നടി അപര്‍ണാ ബാലമുരളി. വണ്ണമുളളതുകൊണ്ട് സിനിമയില്‍ സെലക്ട് ചെയ്യാതിരിക്കുന്നത് ഒരുപാട് വിഷമമുണ്ടാക്കിയിട്ടുണ്ടെന്ന് അപര്‍ണ പറഞ്ഞു. മിര്‍ച്ചി മലയാളത്തിന് നല്‍കിയ അഭിമുഖത്തിലായിരുന്നു തടി മൂലം സിനിമാ മേഖലയിലുണ്ടാവുന്ന മാറ്റിനിര്‍ത്തലുകളെക്കുറിച്ച് നടി തുറന്നുപറഞ്ഞത്.
'സൂരറൈ പോട്രിനാണ് ദേശീയ അവാര്‍ഡ് ലഭിച്ചത്. അത് കഴിഞ്ഞാണ് എനിക്ക് ഈ തടിയുടെ കാര്യങ്ങളൊക്കെ കേള്‍ക്കേണ്ടിവരുന്നത്. ശരീരം തടിച്ചാലും മെലിഞ്ഞാലും നമ്മുടെ കോണ്‍ഫിഡന്‍സാണ് ഏറ്റവും പ്രധാനം. ചില സിനിമകളില്‍ കഥാപാത്രം ഫിറ്റായ ഒരാളാണ് എന്നാണ് പറയുന്നതെങ്കില്‍ നമുക്കത് മനസിലാക്കാം. പക്ഷേ അതിനപ്പുറം, ഒരു സാധാരണ സ്ത്രീയെ സ്‌ക്രിപ്റ്റില്‍ എഴുതിയിട്ട് അയ്യോ നിങ്ങള്‍ തടിച്ചിട്ടാണ് ഇരിക്കുന്നത് പറയുന്നതില്‍ അര്‍ത്ഥമില്ലെന്നാണ് എനിക്ക് തോന്നുന്നത്'-അപര്‍ണ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
'തടിയുളളതുകൊണ്ടുമാത്രം സിനിമയില്‍ സെലക്ട് ചെയ്യാതിരിക്കുക, തടിയുണ്ട് അതുകൊണ്ട് ശരിയാവില്ല എന്നൊക്കെ പറയുമ്പോള്‍ അത് കേള്‍ക്കാന്‍ ബുദ്ധിമുട്ടാണ്. ഞാന്‍ എന്റെ അമ്മയോട് എപ്പോഴും സങ്കടം പറയാറുളള കാര്യമിതാണ്. തടിയുടെ പേരില്‍ സിനിമയില്‍നിന്ന് ഒഴിവാക്കുന്നത്. ഞാന്‍ വലിയ താരമൊന്നുമല്ല. പക്ഷേ സിനിമയില്‍ കഥാപാത്രത്തിനുവേണ്ടി എന്തും ചെയ്യാന്‍ തയാറാണ്. ആ ഫാക്ടര്‍ അവിടെ ഉളളപ്പോള്‍തന്നെ തടിയുണ്ട് അതുകൊണ്ട് വേണ്ട എന്നുവയ്ക്കുന്നത് വേദനിപ്പിക്കുന്ന കാര്യമാണ്'-അപര്‍ണ കൂട്ടിച്ചേര്‍ത്തു.
