ചെന്നൈ: സര്ക്കാര് റിക്രൂട്ട്മെന്റ് പരീക്ഷകളില് ഹിന്ദിയും ഇംഗ്ലീഷും മാത്രമേ ഉപയോഗിക്കാവൂ എന്ന കേന്ദ്രസര്ക്കാര് വിജ്ഞാപനത്തെ എതിര്ത്ത് ഡിഎംകെ എംപി കനിമൊഴി. എല്ലാ കാര്യങ്ങളിലും ഏകത്വം അടിച്ചേല്പ്പിക്കുന്നത് ജനാധിപത്യവിരുദ്ധമാണെന്നും ഭരണഘടന 22 ഭാഷകള് അംഗീകരിച്ചിട്ടുണ്ട് എന്നിട്ടും എസ് എസ് സി പരീക്ഷകള് രണ്ടുഭാഷകളില് മാത്രമായി നടത്തുന്നത് ശരിയല്ലെന്നും കനിമൊഴി പറഞ്ഞു. ട്വിറ്ററിലൂടെയായിരുന്നു അവരുടെ പ്രതികരണം.
'കേന്ദ്രസര്ക്കാരിന്റെ വിവിധ തസ്തികകളിലേക്ക് സ്റ്റാഫ് സെലക്ഷന് കമ്മീഷന് നടത്തുന്ന സിജിഎല് പരീക്ഷകളില് ഇംഗ്ലീഷും ഹിന്ദിയും മാത്രമേ ഉപയോഗിക്കാനാവൂ എന്ന കേന്ദ്രസര്ക്കാര് പ്രഖ്യാപനത്തെ ഞാന് ശക്തമായി എതിര്ക്കുന്നു. ഇന്ത്യാ മഹാരാജ്യത്തിന്റെ പരമാധികാരം അതിന്റെ ബഹുസ്വരതയില് വേരൂന്നിയതാണ്. എല്ലാത്തിലും ഏകത്വം അടിച്ചേല്പ്പിക്കാന് ശ്രമിക്കുന്നത് ജനാധിപത്യ മനോഭാവത്തിന് വിരുദ്ധമാണ്. ഭരണഘടന 22 ഭാഷകളെ അംഗീകരിച്ചിട്ടുണ്ട്. എന്നിട്ടും വെറും രണ്ട് ഭാഷകളില് മാത്രമായി എസ് എസ് സി പരീക്ഷകള് നടത്തുന്നത് ശരിയല്ല'-കനിമൊഴി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കര്ണാടക മുന് മുഖ്യമന്ത്രി എച്ച് ഡി കുമാരസ്വാമിയും കേന്ദ്രസര്ക്കാരിന്റെ ഭാഷാവിവേചനത്തില് എതിര്പ്പ് പ്രകടിപ്പിച്ചു. 'ഇരുപതിനായിരം ഒഴിവുകള് നികത്താന് വെറും രണ്ട് ഭാഷകളിലാണ് പരീക്ഷ നടത്തുന്നത്. തെരഞ്ഞെടുക്കപ്പെട്ട സ്ഥാനാര്ത്ഥികള് ഏത് സംസ്ഥാനത്തേക്കും നിയമിക്കപ്പെടാം. കന്നഡയിലോ മറ്റേതെങ്കിലും പ്രാദേശിക ഭാഷയിലോ പരീക്ഷയെഴുതാനാവില്ല. ഹിന്ദി അടിച്ചേല്പ്പിക്കുന്നതിനും ഭാഷാ വിവേചനത്തിനും മറ്റെന്തെങ്കിലും തെളിവ് ആവശ്യമുണ്ടോ'-എന്നാണ് കുമാരസ്വാമി ട്വീറ്റ് ചെയ്തത്.