ലഖ്നൌ: യു എ പി എ കേസില്‍ ജാമ്യം ലഭിച്ച മാധ്യമ പ്രവര്‍ത്തകന്‍ സിദ്ദീഖ് കാപ്പന്‍റെ ജയില്‍ മോചനം വീണ്ടും അനിശ്ചിതത്വത്തില്‍. ഇ ഡി കേസില്‍ നല്‍കിയ ജാമ്യാപേക്ഷ ലഖ്നൌ ജില്ലാ കോടതി ഇന്നും പരിഗണിച്ചില്ല. മുന്‍ ഉത്തര്‍പ്രദേശ് മുഖ്യമന്ത്രി മുലായം സിംഗ് യാദവിന്റെ നിര്യാണത്തെ തുടര്‍ന്ന് കേസ് ബുധനാഴ്ചയിലേക്ക് മാറ്റുകയായിരുന്നു. നേരത്തെ കഴിഞ്ഞ മാസം 29 നാണ് കോടതി കേസ് പരിഗണിച്ചത്. അന്നത്തെ സിറ്റിംങ്ങിലാണ് കേസ് ഈ മാസം പത്തിലേക്ക്കോടതി മാറ്റിയത്.
യു എ പി എ കേസില്‍ ജാമ്യം അനുവദിച്ചെങ്കിലും അനധികൃതമായി എക്കൌണ്ടില്‍ പണം കണ്ടെത്തിയെന്ന പേരില്‍ ഇ ഡി രജിസ്റ്റര്‍ കേസിലാണ് ഇപ്പോള്‍ ജാമ്യത്തിനായി അപേക്ഷിച്ചിരിക്കുന്നത്. ഹത്രാസില്‍ ദളിത്‌ പെണ്‍കുട്ടി ക്രൂരമായി ബലാല്‍സംഘത്തിന് ഇരയായി കൊല്ലപ്പെട്ട സംഭവം റിപ്പോര്‍ട്ട് ചെയ്യാന്‍ പോയ സിദ്ദീഖ് കാപ്പനെ 2020 ഒക്ടോബര്‍ 5 നാണ് ഉത്തര്‍പ്രദേശ് പൊലീസ് അറസ്റ്റ് ചെയ്തത്. പിന്നീടാണ് കള്ളപ്പണക്കേസില്‍ ഇ ഡി കാപ്പന്‍റെ പേരില്‍ മറ്റൊരു കേസ് രജിസ്റ്റര്‍ ചെയ്തത്.
