തിരുവനന്തപുരം: കെ എസ് ആര് ടി സി ബസുകളില് പരസ്യം പതിക്കരുതെന്ന ഹൈക്കോടതി ഉത്തരവിനെതിരെ ഗതാഗത മന്ത്രി ആന്റണി രാജു. ഹൈക്കോടതി ഉത്തരവ് വന് ബാധ്യതയുണ്ടാക്കുമെന്നും ഉത്തരവിന്റെ പകര്പ്പ് കിട്ടിയതിനുശേഷം നിയമവശം പരിശോധിക്കുമെന്നും മന്ത്രി പറഞ്ഞു. 'ബസുകളില് പരസ്യം പതിക്കാന് അനുവദിക്കുന്നതിലൂടെ പ്രതിമാസം ഒരു കോടി എണ്പത് ലക്ഷം രൂപ കെ എസ് ആര് ടി സിക്ക് ലഭിക്കുന്നുണ്ട്. നമ്മള് മാത്രമല്ല, മറ്റ് സംസ്ഥാനങ്ങളിലെ സര്ക്കാര് ബസുകളിലും പരസ്യം പതിക്കാന് അനുവദിക്കുന്നുണ്ട്. ഹൈക്കോടതിയുടെ ഉത്തരവ് കെ എസ് ആര് ടി സിക്ക് നഷ്ടമുണ്ടാക്കും'- ആന്റണി രാജു പറഞ്ഞു.
കെ എസ് ആര് ടി സി, കെ യു ആര് ടി സി ബസുകളില് പരസ്യങ്ങള് വേണ്ടെന്നും അവ സുരക്ഷാ മാനദണ്ഡങ്ങള്ക്ക് വിരുദ്ധമാണെന്നുമാണ് ഹൈക്കോടതി പറഞ്ഞത്. സുരക്ഷാ മാനദണ്ഡങ്ങള് പാലിക്കുന്നതില് സ്വകാര്യ ബസെന്നോ സര്ക്കാര് ബസെന്നോ വ്യത്യാസമില്ലെന്നും ഹൈക്കോടതി വ്യക്തമാക്കിയിരുന്നു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
പരസ്യങ്ങള് നീക്കണമെന്ന ഹൈക്കോടതിയുടെ നിര്ദേശം നടപ്പിലായാല് കെ എസ് ആര് ടി സിക്ക് പ്രതിമാസം ഒന്നരക്കോടിയോളം രൂപയുടെ നഷ്ടമുണ്ടാകും. കെ എസ് ആര് ടിസിയുടെ ടിക്കറ്റിതര വരുമാനത്തിന്റെ ഭൂരിഭാഗവും ബസില് പതിപ്പിക്കുന്ന പരസ്യത്തില്നിന്നാണ് ലഭിക്കുന്നത്. പതിനായിരത്തി അഞ്ഞൂറ് രൂപയാണ് ഒരു കെ എസ് ആര് ടി സി ബസില് പരസ്യം പതിക്കാനായി വാങ്ങുന്നത്. ഉത്തരവ് നടപ്പിലാക്കിയാല് മുന്കൂറായി വാങ്ങിയ പണം തിരികെ നല്കേണ്ടിവരും.