ബംഗളുരു: ഗുജറാത്തിലെ മോര്‍ബി തൂക്കുപാലം തകര്‍ന്ന് 138 പേര്‍ മരിച്ച സംഭവത്തില്‍ പ്രധാനമന്ത്രി നരേന്ദ്രമോദിക്കെതിരെ രൂക്ഷവിമര്‍ശനവുമായി കോണ്‍ഗ്രസ് അധ്യക്ഷന്‍ മല്ലികാര്‍ജ്ജുന്‍ ഖാര്‍ഗെ. മോര്‍ബി ദുരന്തത്തിന്റെ ധാര്‍മ്മിക ഉത്തരവാദിത്തം ഏറ്റെടുത്ത് പ്രധാനമന്ത്രി രാജിവയ്ക്കണമെന്ന് മല്ലികാര്‍ജ്ജുന്‍ ഖാര്‍ഗെ പറഞ്ഞു. ട്രെയിനിന് ഗ്രീന്‍ സിഗ്നല്‍ കിട്ടുന്നതിന്റെ പോലും ക്രെഡിറ്റെടുക്കാറുളള മോദി മോര്‍ബി പാലം തകര്‍ന്ന് 138 പേര്‍ മരിച്ചതിന്റെ ക്രെഡിറ്റ് കൂടെ എടുക്കണമെന്നും ബിജെപി രാജ്യത്തെ തകര്‍ത്തുകൊണ്ടിരിക്കുകയാണെന്നും അദ്ദേഹം പറഞ്ഞു.
'ട്രെയിനിന് ഗ്രീന്‍ സിഗ്നല്‍ കിട്ടുന്നതുപോലുളള ചെറിയ കാര്യങ്ങളുടെ ക്രെഡിറ്റുപോലും പ്രധാനമന്ത്രി എടുക്കാറുണ്ട്. മോര്‍ബി പാലം രണ്ടുകോടി രൂപ മുടക്കി നവീകരിച്ചതിന്റെയും ക്രെഡിറ്റ് മോദിക്കാണ്. അദ്ദേഹത്തിന്റെ ഐശ്വര്യമാണോ എന്നറിയില്ല. ഉദ്ഘാടനം കഴിഞ്ഞ് 5 ദിവസത്തിനുളളില്‍ പാലം തകര്‍ന്നുവീണു. 138 പേര്‍ക്ക് ജീവന്‍ നഷ്ടമായി. ഇതിനെല്ലാം ഉത്തരവാദികളാരാണ്? ആരെങ്കിലും രാജിവെച്ചതായി അറിയാമോ? പ്രധാനമന്ത്രി രാജിവെച്ചോ?'-മല്ലികാര്‍ജ്ജുന്‍ ഖാര്‍ഗെ ചോദിച്ചു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
'പശ്ചിമ ബംഗാളില്‍ സമാനമായ ഒരു അപകടമുണ്ടായപ്പോള്‍ ബംഗാള്‍ സര്‍ക്കാരിന്റെ തിന്മകള്‍ക്കെതിരെ ദൈവകോപമുണ്ടായതാണ് എന്നാണ് പ്രധാനമന്ത്രി പറഞ്ഞത്. അപ്പോള്‍ ഗുജറാത്തിലുണ്ടായതും ദൈവകോപമാണോ? വിലക്കയറ്റത്തെയും തൊഴിലില്ലായ്മയെയും കുറിച്ചുളള ചോദ്യങ്ങള്‍ക്ക് ഉത്തരം നല്‍കുന്നതിനുപകരം അദ്ദേഹം ക്ഷേത്രങ്ങള്‍ സന്ദര്‍ശിക്കുകയോ ഗുഹകളില്‍ കയറി പ്രാര്‍ത്ഥിക്കുകയോ ആണ് ചെയ്യുന്നത്. പ്രധാനമന്ത്രിക്ക് പ്രാര്‍ത്ഥിക്കാന്‍ അവകാശമുണ്ട്. പക്ഷേ രാജ്യത്ത് വിശന്നിരിക്കുന്നവന് ഭക്ഷണം ലഭിക്കണം. പണപ്പെരുപ്പം നിയന്ത്രിക്കുകയും തൊഴിലില്ലായ്മയ്ക്ക് പരിഹാരമുണ്ടാക്കുകയും വേണം- മല്ലികാര്‍ജ്ജുന്‍ ഖാര്‍ഗെ കൂട്ടിച്ചേര്‍ത്തു.
