തിരുവനന്തപുരം: കേരളാ പൊലീസ് എ കെ ജി സെന്ററിലെ അടിമപ്പണിയെടുക്കുകയാണെന്ന് പ്രതിപക്ഷ നേതാവ് വി ഡി സതീശന്. പൊലീസ് സേനയെ പൂര്ണ്ണമായും എ കെ ജി സെന്ററിന് പണയപ്പെടുത്തിയിരിക്കുകയാണെന്നും കോര്പ്പറേഷനിലെ നിയമനങ്ങള് പാര്ട്ടിക്ക് വിട്ടുകൊടുത്ത മേയര്ക്കെതിരെ പ്രതിഷേധിക്കുന്നവരെ അടിച്ചമര്ത്താന് പൊലീസിന്റെ ജോലിയുമായി സിപിഎമ്മും ഡി വൈ എഫ് ഐയും ഇറങ്ങിയിരിക്കുകയാണെന്നും വി ഡി സതീശന് ആരോപിച്ചു.
'എസ് ഐയും പൊലീസുകാരനും നോക്കിനില്ക്കെയാണ് പ്രിന്സിപ്പാളിന്റെ മുട്ടുകാല് തല്ലിയൊടിക്കുമെന്ന് എസ് എഫ് ഐ ജില്ലാ സെക്രട്ടറി ഭീഷണിപ്പെടുത്തിയത്. അതില് പൊലീസ് ഒരു നടപടിയുമെടുത്തില്ല. മേയര്ക്കെതിരെ പ്രതിഷേധിച്ചതിന് കെ എസ് യു പ്രവര്ത്തകരെ റോഡിലിട്ട് ചവിട്ടിക്കൂട്ടിയത് ഇതേ പൊലീസ് നോക്കിനില്ക്കുമ്പോഴാണ്. പാര്ട്ടി തന്നെ കോടതിയും പൊലീസും പബ്ലിക് സര്വ്വീസ് കമ്മീഷനും എംപ്ലോയ്മെന്റ് എക്സ്ചേഞ്ചുമായി മാറുകയാണ്'- വി ഡി സതീശന് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
തുടര്ഭരണം ലഭിച്ചതിന്റെ അഹങ്കാരവും ധാര്ഷ്ട്യവുമാണ് സര്ക്കാരിനെന്നും എല്ലാം പാര്ട്ടി അണികള്ക്ക് വിട്ടുകൊടുത്ത് മുഖ്യമന്ത്രി ഉറങ്ങുകയാണെന്നും അദ്ദേഹം ആരോപിച്ചു. 'ആഭ്യന്തര വകുപ്പിനെ നിയന്ത്രിക്കുന്നത് സിപിഎമ്മുകാരാണ്. ഉന്നത ഉദ്യോഗസ്ഥര് പറഞ്ഞാല് കേള്ക്കാത്ത പൊലീസുകാര് പാര്ട്ടി പ്രവര്ത്തകര് പറഞ്ഞാലേ അനുസരിക്കൂ എന്ന അവസ്ഥയാണ്'- പ്രതിപക്ഷ നേതാവ് കൂട്ടിച്ചേര്ത്തു.