കൊച്ചി: സിനിമാ നിരൂപണത്തെക്കുറിച്ച് സംവിധായിക അഞ്ജലി മേനോന്‍ നടത്തിയ പരാമര്‍ശത്തില്‍ പ്രതികരണവുമായി സംവിധായകന്‍ ജൂഡ് ആന്റണി ജോസഫ്. നല്ല സിനിമയെ എഴുതി തോല്‍പ്പിക്കാനും മോശം സിനിമയെ എഴുതി വിജയിപ്പിക്കാനും ആവില്ലെന്ന് ജൂഡ് ആന്റണി പറഞ്ഞു. 'ഞാന്‍ സിനിമാ പ്രേക്ഷകനാണ്. അധ്വാനിച്ച പണംകൊണ്ട് സിനിമ കാണുന്നയാള്‍. സിനിമ ഡയറക്ട് ചെയ്യാന്‍വേണ്ടി പോലും കോഴ്‌സ് ചെയ്തിട്ടില്ല. പിന്നെയല്ലേ അഭിപ്രായം പറയാന്‍. നല്ല സിനിമയെ എഴുതിത്തോല്‍പ്പിക്കാനാവില്ല. അതുപോലെ മോശം സിനിമയെ എഴുതി വിജയിപ്പിക്കാനും. as simple as that'- ജൂഡ് ആന്റണി ഫേസ്ബുക്കില്‍ കുറിച്ചു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
സിനിമ എന്താണെന്ന് പഠിച്ചിട്ട് റിവ്യൂ എഴുതുന്നതാണ് നല്ലത് എന്നാണ് അഞ്ജലി മേനോന്‍ ഫിലിം കമ്പാനിയന് നല്‍കിയ അഭിമുഖത്തില്‍ പറഞ്ഞത്. 'ചലച്ചിത്ര നിരൂപണം നടത്തുന്നവര്‍ അതിനുമുന്‍പ് സിനിമ എന്താണെന്നും അത് എങ്ങനെ രൂപപ്പെടുന്നുവെന്നും അറിയണം. സിനിമയ്ക്ക് ലാഗുണ്ടെന്ന് ചിലര്‍ പറയുന്നത് കേള്‍ക്കുമ്പോള്‍ ചിരി വരാറുണ്ട്. അത് പറയുന്നവര്‍ എഡിറ്റിംഗ് എന്താണെന്ന് കുറച്ചെങ്കിലും അറിഞ്ഞിരിക്കണം. ഒരു ബന്ധവുമില്ലാത്ത സിനിമകളെ താരതമ്യം ചെയ്യുന്നവരുണ്ട്. സിനിമയുടെ കഥയെന്താണെന്നും അത് എങ്ങനെയാണ് പറയുന്നതെന്നും അറിഞ്ഞിരിക്കണം. റിവ്യു ചെയ്യുന്നവര്‍ സിനിമ എന്താണെന്ന് മനസിലാക്കിയിട്ട് ചെയ്യുകയാണെങ്കില്‍ അത് ഗുണം ചെയ്യും'-എന്നാണ് അഞ്ജലി മേനോന്‍ പറഞ്ഞത്.
