കൊച്ചി: ചെലവന്നൂര് കായല് തീരത്തെ ഭൂമി കയ്യേറിയെന്ന കേസില് നടന് ജയസൂര്യയ്ക്ക് സമന്സ് അയച്ച് വിജിലന്സ് കോടതി. മൂവാറ്റുപുഴ വിജിലന്സ് കോടതിയാണ് സമന്സ് അയച്ചത്. കോര്പറേഷന് എഞ്ചിനീയറിംഗ് വിഭാഗത്തിലെ ഉദ്യോഗസ്ഥരടക്കമുള്ള നാലു പ്രതികളോടും ഡിസംബര് 29- ന് നേരിട്ട് ഹാജരാകാനാണ് നിര്ദ്ദേശം. ജയസൂര്യ കായല് കയ്യേറിയെന്ന് വിജിലന്സ് അന്വേഷണത്തില് കണ്ടെത്തിയിരുന്നു. കോര്പറേഷന് എഞ്ചിനീയറിംഗ് വിഭാഗത്തിലെ മൂന്നു ഉദ്യോഗസ്ഥരും ജയസൂര്യയുമാണ് പ്രതികള്. മൂവാറ്റുപുഴ വിജിലന്സ് കോടതി എഫ് ഐ ആര് രജിസ്റ്റര് ചെയ്തിട്ട് 6 വര്ഷമായെങ്കിലും കുറ്റപത്രം സമര്പ്പിച്ചിരുന്നില്ല. ഇതേതുടര്ന്ന് ഹര്ജിക്കാരനായ ഗിരീഷ് ബാബു വീണ്ടും ഹര്ജി ഫയല് ചെയ്തതോടെയാണ് വിജിലന്സ് കോടതിയില് കുറ്റപത്രം സമര്പ്പിച്ചത്.
2016-ലാണ് കായല് കൈയ്യേറ്റക്കേസില് ജയസൂര്യക്കെതിരെ അന്വേഷണം ആരംഭിക്കുന്നത്. കായല്ഭൂമി കയ്യേറി ബോട്ടുജെട്ടിയും ചുറ്റുമതിലും നിര്മ്മിച്ചത് സര്ക്കാർ സംവിധാനങ്ങള് ദുരുപയോഗിച്ചാണെന്ന സംശയത്തിലാണ് കോടതി അന്വേഷണത്തിന് ഉത്തരവിട്ടത്. കൊച്ചി വിജിലന്സ് ഡിവൈഎസ്പിക്കായിരുന്നു അന്വേഷണ ചുമതല. കോടതിയുടെ സംശയം ശരിവെച്ചുവെക്കുന്ന തരത്തിലാണ് വിജിലന്സ് അന്വേഷണം റിപ്പോര്ട്ട്. കോര്പറേഷന് എഞ്ചിനീയറിംഗ് വിഭാഗം ഉദ്യോഗസ്ഥരായ കെ പി രാമചന്ദ്രന് എന്എം ജോര്ജ്ജ് ഗിരിജാ ദേവി തുടങ്ങിയവരെയും പ്രതിചേര്ത്താണ് കുറ്റപത്രം സമര്പ്പിച്ചിരിക്കുന്നത്. അതേസമയം, കുറ്റപത്രത്തിനെതിരെ പ്രതികള് ഹൈക്കോടതിയെ സമീപിക്കുമെന്നാണ് സൂചന.