കോഴിക്കോട്: ശശി തരൂര് പങ്കെടുക്കേണ്ടിയിരുന്ന സെമിനാറിന്റെ സംഘാടനത്തില്നിന്ന് യൂത്ത് കോണ്ഗ്രസ് പിന്മാറിയ സംഭവം പരിശോധിക്കുമെന്ന് സംഘടനയുടെ വൈസ് പ്രസിഡന്റ് റിജില് മാക്കുറ്റി. കോണ്ഗ്രസിന്റെ അവിഭാജ്യ ഘടകമാണ് ശശി തരൂരെന്നും അദ്ദേഹം മാറ്റിനിര്ത്തപ്പെടേണ്ടയാളല്ലെന്നും റിജില് മാക്കുറ്റി പറഞ്ഞു. ശശി തരൂരിനുവേണ്ടി ബുധനാഴ്ച്ച കണ്ണൂരില് യൂത്ത് കോണ്ഗ്രസ് പരിപാടി നടത്തുമെന്നും പാര്ട്ടിയുടെ ആഭ്യന്തര കാര്യമായതിനാല് മറ്റ് കാര്യങ്ങള് പുറത്തുപറയുന്നില്ലെന്നും അദ്ദേഹം കൂട്ടിച്ചേര്ത്തു.
സംഘപരിവാറും മതേതരത്വം നേരിടുന്ന വെല്ലുവിളികളും എന്ന ശശി തരൂരിന്റെ സംവാദ പരിപാടിയില് റിജില് മാക്കുറ്റിയും എംകെ രാഘവന് എംപിയും പങ്കെടുത്തിരുന്നു. കെ പി സി സി അധ്യക്ഷന് കെ സുധാകരന്റെ അനുവാദത്തോടെയാണ് പരിപാടിയില് പങ്കെടുത്തതെന്നും എന്ത് കിട്ടും എന്നുനോക്കി താന് നിലപാടെടുക്കാറില്ലെന്നും റിജില് മാക്കുറ്റി പറഞ്ഞു. അത്തരം നിലപാടുകളെടുക്കുമ്പോള് വിമര്ശനങ്ങളുണ്ടാകും. പലതും നഷ്ടപ്പെടും. പക്ഷെ എടുത്ത നിലപാടുകള് ശരിയാണെന്ന് കാലം തെളിയിച്ചിട്ടുണ്ട് എന്നാണ് ശശി തരൂരിനൊപ്പമുളള ചിത്രത്തിനൊപ്പം റിജില് മാക്കുറ്റി ഫേസ്ബുക്കില് കുറിച്ചത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ശശി തരൂരിന്റെ പരിപാടി മാറ്റിവെച്ച സംഭവത്തിനുപിന്നില് ഗൂഢാലോചന നടന്നിട്ടുണ്ടെന്ന് കെ മുരളീധരന് എംപിയും പറഞ്ഞിരുന്നു. ശശി തരൂരിനെതിരെ നീക്കം നടത്തുന്നത് മുഖ്യമന്ത്രി സ്ഥാനമോഹികളാണെന്നും നടന്നത് എന്താണെന്ന് അറിയാമെങ്കിലും പാര്ട്ടി കാര്യമായതിനാല് തുറന്നുപറയുന്നില്ലെന്നുമാണ് മുരളീധരന് പറഞ്ഞത്.