ചെന്നൈ: തമിഴ്‌നാട് മുഖ്യമന്ത്രി എം കെ സ്റ്റാലിന്റെ മകനും ഡിഎംകെ യൂത്ത് വിങ്ങ് സെക്രട്ടറിയുമായ ഉദയനിധി സ്റ്റാലിന്‍ അടുത്തയാഴ്ച്ച കാബിനറ്റ് മന്ത്രിയായി സത്യപ്രതിജ്ഞ ചെയ്യുമെന്ന് റിപ്പോര്ട്ട്. ഉദയനിധി ഗ്രാമവികസന വകുപ്പ് മന്ത്രിയാകുമെന്നാണ് അടുത്ത വൃത്തങ്ങള്‍ നല്‍കുന്ന സൂചന. ഡിഎംകെയുടെ ഉദയസൂര്യന്‍ എന്ന് വിശേഷിപ്പിക്കുന്ന ഉദയനിധി ചെപ്പോക്ക് തിരുവല്ലിക്കേനി നിയമസഭാ മണ്ഡലത്തില്‍നിന്നുളള എംഎല്‍എയാണ്. കരുണാനിധിയുടെ കുടുംബത്തില്‍നിന്ന് വരുന്ന മൂന്നാംതലമുറ നേതാവാണ് അദ്ദേഹം.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
2019-ലാണ് ഉദയനിധി സ്റ്റാലിനെ ഡിഎംകെ യൂത്ത് വിങ്ങ് സെക്രട്ടറിയായി നിയമിച്ചത്. കഴിഞ്ഞ വര്‍ഷം നടന്ന തെരഞ്ഞെടുപ്പില്‍ ഡിഎംകെയുടെ താരപ്രചാരകന്‍ കൂടിയായിരുന്നു ഉദയനിധി. പ്രചാരണത്തിനിടെ പ്രധാനമന്ത്രി നരേന്ദ്രമോദിയെയും അമിത് ഷായെയും വിമര്‍ശിച്ച് അദ്ദേഹം ദേശീയ തലത്തില്‍ ശ്രദ്ധിക്കപ്പെട്ടിരുന്നു.
2018-ല്‍ എം കരുണാനിധിയുടെ മരണത്തെത്തുടര്‍ന്ന് എംകെ സ്റ്റാലിന്‍ ഡിഎംകെ അധ്യക്ഷ പദവി ഏറ്റെടുക്കുകയായിരുന്നു. 2021-ലെ നിയമസഭാ തെരഞ്ഞെടുപ്പില്‍ ഡിഎംകെയുടെ നേതൃത്വത്തിലുളള സഖ്യം വിജയിച്ചതോടെ അദ്ദേഹം മുഖ്യമന്ത്രിയായി ചുമതലയേറ്റു.
