പാലക്കാട്: യൂത്ത് കോണ്ഗ്രസിന്റെ പാലക്കാട് ജില്ലാ ക്യാംപില് കെ പി സി സി പ്രസിഡന്റ് കെ സുധാകരനെതിരെ രൂക്ഷവിമര്ശനം. അട്ടപ്പാടിയില് നടക്കുന്ന ജില്ലാ ക്യാംപില് അവതരിപ്പിച്ച രാഷ്ട്രീയ പ്രമേയത്തിലാണ് കെ സുധാകരനെതിരെ വിമര്ശനമുയര്ന്നത്. ആര്എസ്എസിനോട് കെ സുധാകരന് കാണിച്ച മൃദുസമീപനം അംഗീകരിക്കാനാവില്ലെന്നും എത്ര വലിയ നേതാവാണെങ്കിലും ആര്എസ്എസിനെ സംരക്ഷിച്ച് സംസാരിച്ചാല് അത് നാക്കുപിഴയായി കണക്കാക്കി മിണ്ടാതിരിക്കാനാവില്ലെന്നും ജില്ലാ ക്യാംപില് അഭിപ്രായമുയര്ന്നു.
പാര്ട്ടി ആര്എസ്എസിന് സംരക്ഷണം കൊടുക്കുന്നു, താങ്ങിനിര്ത്തുന്നു എന്ന രീതിയില് ഏത് കൊടികുത്തിയ കൊമ്പന് സംസാരിച്ചാലും കയ്യും വായും പൊത്തി മിണ്ടാതിരിക്കാന് യൂത്ത് കോണ്ഗ്രസിന് കഴിയില്ലെന്ന് കെ പി സി സിയെ ഓര്മ്മിപ്പിക്കുന്നു എന്നും ആരെങ്കിലും അങ്ങനെ സംസാരിച്ചാല് അവരെ ഒറ്റുകാരനെന്ന് വിളിക്കാന് മടിക്കാത്ത പ്രസ്ഥാനമായി യൂത്ത് കോണ്ഗ്രസ് മാറുമെന്നും പ്രമേയത്തില് പറയുന്നു. യൂത്ത് കോണ്ഗ്രസ് പാലക്കാട് ജില്ലാ പ്രസിഡന്റ് അരുണ് കുമാര് പാലക്കുഴിയാണ് പ്രമേയം അവതരിപ്പിച്ചത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ജനസ്വാധീനമുളള, ജനങ്ങള്ക്കിടയിലേക്ക് ഇറങ്ങിച്ചെല്ലുന്ന നേതാക്കള്ക്ക് ഭ്രഷ്ട് കല്പ്പിക്കുന്ന കോണ്ഗ്രസ് നടപടി അംഗീകരിക്കില്ലെന്നും അത്തരത്തില് ഒഴിവാക്കപ്പെടുന്ന നേതാക്കള്ക്ക് യൂത്ത് കോണ്ഗ്രസ് വേദി നല്കുമെന്നും പ്രമേയത്തില് പറയുന്നു. ശശി തരൂരിന്റെ പേരെടുത്തു പറയാതെയായിരുന്നു യൂത്ത് കോണ്ഗ്രസിന്റെ പ്രമേയം.