ഡല്ഹി: ശബരിമല യുവതീപ്രവേശനവുമായി ബന്ധപ്പെട്ട കേസില് ആക്ടിവിസ്റ്റ് രഹനാ ഫാത്തിമയ്ക്ക് ജാമ്യവ്യവസ്ഥയില് ഇളവ് നല്കരുതെന്ന് സര്ക്കാര് സുപ്രീംകോടതിയില്. രഹന ഫാത്തിമ പലതവണ ജാമ്യവ്യവസ്ഥകള് ലംഘിച്ചെന്നും മതവികാരം വ്രണപ്പെടുത്തുന്ന പോസ്റ്റുകള് വീണ്ടും പ്രചരിപ്പിച്ചെന്നും കേരളം സുപ്രീംകോടതിയില് സമര്പ്പിച്ച സത്യവാങ്മൂലത്തില് പറയുന്നു. ജാമ്യവ്യവസ്ഥയില് ഇളവുതേടിയുളള രഹനയുടെ ഹര്ജി തളളണമെന്നും കേരളം ആവശ്യപ്പെട്ടു. ശബരിമലയില് കയറാന് ശ്രമിച്ചതിന് പത്തനംതിട്ട പൊലീസ് എടുത്ത കേസില് ഹൈക്കോടതി നല്കിയ ജാമ്യത്തിലെ വ്യവസ്ഥകള് ലഘൂകരിക്കണമെന്നാവശ്യപ്പെട്ടാണ് രഹന സുപ്രീംകോടതിയെ സമീപിച്ചത്. അതിനെതിരെയാണ് സര്ക്കാരിന്റെ സത്യവാങ്മൂലം.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
2018-ല് യുവതികള്ക്ക് ശബരിമലയില് കയറാമെന്ന് സുപ്രീംകോടതി വിധി വന്നപ്പോള് താന് ശബരിമലയ്ക്ക് പോവുകയാണെന്ന അടിക്കുറിപ്പോടെ രഹന കറുത്ത വസ്ത്രം ധരിച്ച ചിത്രം ഫേസ്ബുക്കില് പങ്കുവെച്ചത്. ഇത് തങ്ങളുടെ മതവികാരം വ്രണപ്പെടുത്തിയെന്ന് ചൂണ്ടിക്കാട്ടി ബിജെപി പ്രവര്ത്തകരാണ് പത്തനംതിട്ട പൊലീസില് പരാതി നല്കിയത്. സംഭവത്തില് പൊലീസ് രഹനയെ അറസ്റ്റ് ചെയ്തെങ്കിലും ഹൈക്കോടതി ജാമ്യമനുവദിക്കുകയായിരുന്നു. തുടര്ന്ന് രഹന തന്റെ യൂട്യൂബ് ചാനലില് 'ഗോമാതാ ഉലര്ത്ത്' എന്ന പേരില് കുക്കറി വീഡിയോ പോസ്റ്റ് ചെയ്തിരുന്നു. ഇത് മതവികാരം വ്രണപ്പെടുത്തിയെന്ന് ആരോപിച്ച് വീണ്ടും ബിജെപി പ്രവര്ത്തകര് ഹൈക്കോടതിയെ സമീപിച്ചു. ഒരിക്കല്കൂടി അവസരം നല്കാമെന്നും ഇനിയും ഇത്തരം പ്രവര്ത്തനങ്ങളുണ്ടാകരുതെന്നും ഹൈക്കോടതി അന്ന് രഹനയ്ക്ക താക്കീത് നല്കിയിരുന്നു.