തിരുവനന്തപുരം: സിപിഎമ്മിനെതിരെ ആരോപണങ്ങള് വരുമ്പോള് കേന്ദ്ര ഏജന്സികള് മൗനം പാലിക്കുന്നത് എന്തുകൊണ്ടാണെന്ന് പ്രതിപക്ഷ നേതാവ് വി ഡി സതീശന്. റിസോര്ട്ട്, കള്ളപ്പണം വെളുപ്പിക്കല്, കൊട്ടേഷന് വിവാദങ്ങളിലൂടെ സിപിഎമ്മിലെ ജീര്ണത മറനീക്കി പുറത്തു വരികയാണ്. സംസ്ഥാനത്ത് നടക്കുന്ന എല്ലാ സാമൂഹികവിരുദ്ധ ഇടപാടുകള്ക്ക് പിന്നിലും സിപിഎം സാന്നിധ്യമുണ്ടെന്നും വി ഡി സതീശന് ആരോപിച്ചു.
ഇ.പി ജയരാജനെതിരെ പി. ജയരാജന് ആരോപണം ഉന്നയിച്ചെന്ന വാര്ത്ത പുറത്ത് വന്നിട്ടും അമ്പരപ്പിക്കുന്ന മൗനമാണ് മുഖ്യമന്ത്രിയുടെയും പാര്ട്ടി നേതാക്കളുടെയും ഭാഗത്ത് നിന്നുണ്ടായത്. അവര് പ്രതികരിക്കുന്നില്ലെന്നു മാത്രമല്ല ആരോപണങ്ങള് നിഷേധിക്കാനും തയാറായിട്ടില്ല. നേരത്തെ മന്ത്രി ആയിരുന്ന നേതാവ് അനധികൃതമായി സമ്പാദിച്ച പണം കൊണ്ടാണ് റിസോര്ട്ട് നിര്മ്മിച്ചതെന്നും കള്ളപ്പണം വെളുപ്പിക്കല് നടന്നെന്നുമുള്ള ഗുരുതരമായ ആരോപണങ്ങളാണ് പുറത്ത് വന്നത്. മറ്റൊരു നേതാവിന് സ്വര്ണക്കടത്ത്, കൊട്ടേഷന് സംഘങ്ങളുമായി ബന്ധമുണ്ടെന്നാണ് മറുവിഭാഗം പറയുന്നതെന്നും വി ഡി സതീശന് കൂട്ടിച്ചേര്ത്തു.
അതേസമയം, എല് ഡി എഫ് കണ്വീനര് ഇ പി ജയരാജനെതിരെ സ്വന്തം പാര്ട്ടിയില് നിന്നുതന്നെ ഉയര്ന്നുവന്ന ആരോപണം ഗൗരവതരമാണെന്ന് കോണ്ഗ്രസ് നേതാവ് രമേശ് ചെന്നിത്തലയും അഭിപ്രായപ്പെട്ടു. ജയരാജന് മന്ത്രിയായിരിക്കുമ്പോള് പദവി ദുരുപയോഗം ചെയ്തുവെന്നാണ് ആരോപണത്തില് നിന്നും വ്യക്തമാകുന്നത്. പാര്ട്ടിയിലെ മുതിര്ന്ന നേതാവ് തന്നെയാണ് ഇ പി ജയരാജനെതിരെ ആരോപണം ഉന്നയിച്ചിരിക്കുന്നതെന്നും അദ്ദേഹം പറഞ്ഞു. പാര്ട്ടി നേതാക്കള്ക്കെതിരെ ഗുരുതര ആരോപണങ്ങള് ഉയരുമ്പോള് പാര്ട്ടി അന്വേഷിക്കുമെന്ന പതിവ് പല്ലവി അംഗീകരിക്കില്ല. ഇക്കാര്യത്തില് മുഖ്യമന്ത്രി വ്യക്തത വരുത്തണമെന്നും രമേശ് ചെന്നിത്തല ആവശ്യപ്പെട്ടു.