തിരുവനന്തപുരം: സജി ചെറിയാനെ മന്ത്രിയാക്കാന് ഗവര്ണര് ആരിഫ് മുഹമ്മദ് ഖാന് നിയമപരമായി മാത്രം നടപടിയെടുത്താല് മാത്രം മതിയെന്ന് സിപിഎം സംസ്ഥാന സെക്രട്ടറി എം വി ഗോവിന്ദന്. നിയമത്തിന്റെ പേര് പറഞ്ഞ് ഗവര്ണര് സര്ക്കാരിനെ തന്നെ ആലോസരപ്പെടുത്താനാണ് ശ്രമിച്ചുകൊണ്ടിരിക്കുന്നത്. എല്ലാവരും നിയമപരമായി കാര്യങ്ങള് കൈകാര്യം ചെയ്ത് പോയാല് ഒരു പ്രയാസവുമുണ്ടാകില്ല. നിയമവിരുദ്ധവും ഭരണഘടനാവിരുദ്ധവുമായ നിലയിലേക്ക് കാര്യങ്ങള് പോകുമ്പോഴാണ് പ്രശ്നമുണ്ടാകുന്നത്. ഭരണഘടനയെ വിമര്ശിക്കുന്നത് കുറ്റകരമല്ലെന്ന് സുപ്രീംകോടതി തന്നെ വ്യക്തമാക്കിയിട്ടുണ്ടെന്നും എം വി ഗോവിന്ദന് കൂട്ടിച്ചേര്ത്തു.
ഭരണഘടനയെ അതിക്ഷേപിച്ച കേസില് കോടതി പൂര്ണമായും കുറ്റവിമുക്തനാക്കിയെന്ന് പൂര്ണമായും ബോധ്യം വന്നാല് മാത്രം സജി ചെറിയാന്റെ സത്യപ്രതിജ്ഞയ്ക്ക് അനുവാദം നല്കിയാല് മതിയെന്നാണ് ഗവര്ണര്ക്ക് ലഭിച്ചിരിക്കുന്ന നിയമോപദേശം. അതേസമയം, ഗവര്ണര് ഇന്ന് മുഖ്യമന്ത്രിയോട് വിശദീകരണം ചോദിക്കുമെന്നാണ് മാധ്യമങ്ങള് റിപ്പോര്ട്ട് ചെയ്യുന്നത്. ഈ മാസം നാലിന് സജി ചെറിയാന്റെ സത്യപ്രതിജ്ഞ നടത്താന് മുഖ്യമന്ത്രി ഗവര്ണറോട് സമയം ചോദിച്ചിരുന്നു. ഇതിനുപിന്നാലെയാണ് ഗവര്ണര് നിയമോപദേശം തേടിയത്.